Дар Душанбе байни вазоратҳои корҳои хориҷии Тоҷикистон ва Фаластин машваратҳои сиёсӣ баргузор шуданд

ДУШАНБЕ, 29.08.2023 /АМИТ «Ховар»/. Имрӯз, 29 август дар шаҳри Душанбе мулоқоти Вазири корҳои хориҷии Ҷумҳурии Тоҷикистон Сироҷиддин Муҳриддин бо Вазири корҳои хориҷӣ ва муҳоҷирини Давлати Фаластин Риёз Ал-Моликӣ баргузор гардид. Дар ин хусус ба АМИТ «Ховар» дар Вазорати корҳои хориҷии Ҷумҳурии Тоҷикистон хабар доданд.

Дар музокирот масъалаҳои ҳамкории мутақобилан судманд байни ду давлат мавриди баррасӣ қарор гирифтанд.

Пас аз мулоқоти дуҷониба бо роҳбарии вазирони корҳои хориҷии ду давлат даври сеюми машваратҳои сиёсӣ байни Вазорати корҳои хориҷии Ҷумҳурии Тоҷикистон ва Вазорати корҳои хориҷӣ ва муҳоҷирини Давлати Фаластин баргузор гардид.

Зимни машваратҳо байни ҷонибҳо оид ба ҳолати кунунӣ ва дурнамои муносибатҳои дуҷониба дар соҳаҳои сиёсӣ, иқтисодӣ, тиҷорат, сармоягузорӣ, сайёҳӣ, ҳуқуқӣ, фарҳанг, илму маориф ва тандурустӣ, инчунин ҳамкории ду давлат дар доираи созмонҳои минтақавӣ ва байналмилалӣ табодули афкор доир шуд.

Дар фарҷоми машваратҳои сиёсӣ баимзорасонии санадҳои зерин баргузор шуд:

— Протоколи машваратҳои сиёсӣ байни Вазорати корҳои хориҷии Ҷумҳурии Тоҷикистон ва Вазорати корҳои хориҷӣ ва муҳоҷирони Давлати Фаластин;

— Созишнома байни Ҳукумати Ҷумҳурии Тоҷикистон ва Ҳукумати Давлати Фаластин оид ба ҳамкорӣ дар соҳаи таҳсилоти олӣ ва тадқиқоти илмӣ;

— Созишнома байни Вазорати кишоварзии Ҷумҳурии Тоҷикистон ва Вазорати кишоварзии Давлати Фаластин оид ба ҳамкорӣ дар соҳаи кишоварзӣ.

АКС: Вазорати корҳои хориҷии Ҷумҳурии Тоҷикистон