ОБОДИИ МАҲАЛ. Дар деҳаи Ҷовидони Ҷамоати деҳоти Қаратоғ 1,5 км роҳи байнидеҳавӣ асфалтпӯш мегардад

ДУШАНБЕ, 11.08.2023. /АМИТ «Ховар»/. Сокинони деҳаи Ҷовидони Ҷамоати деҳоти Қаратоғи шаҳри Турсунзода иқдоми роҳсозиро идома дода, дар муддати кӯтоҳтарин роҳи байнидеҳавиро барои асфалтпӯшкунӣ омода намуданд. Дар ин хусус ба АМИТ «Ховар» дар Мақомоти иҷроияи ҳокимияти давлатии шаҳри Турсунзода иттилоъ доданд.

Маблағгузории таъмири роҳ аз ҳисоби соҳибкори маҳаллӣ Ҳоҷӣ Умаралӣ Сафаров ва бо ташаббуси сокинони деҳа амалӣ гардид. Аз ободии кӯчаҳои деҳа илҳом гирифта, соҳибкор — сокини деҳаи Ҷовидон Салим Маҷидов боз барои асфалтпӯш намудани 500 метри дигари роҳи деҳа сарпарастиро ба уҳда гирифт.

Сокинони деҳаи Ҷовидони Ҷамоати деҳоти Қаратоғ ният доранд, ки ояндаи наздик тамоми кӯчаҳои байни деҳаро, ки зиёда аз 3,5 км-ро ташкил медиҳанд, пурра асфалтпӯш намоянд.

АКС: Мақомоти иҷроияи ҳокимияти давлатии шаҳри Турсунзода