Имконоти сайёҳии Тоҷикистон дар маҷаллаи «Diplomatic world» нашр карда мешавад

ДУШАНБЕ, 27.09.2023. /АМИТ «Ховар»/. Байни Кумитаи рушди сайёҳии назди Ҳукумати Ҷумҳурии Тоҷикистон ва маҷаллаи «Diplomatic world» ҷиҳати табодули таҷриба ва эътирофи иқтидорҳои истифоданашудаи сайёҳии Тоҷикистон, аз ҷумла сайёҳии фарҳангӣ ва табиӣ ёддошти тафоҳум ба имзо расонида шуд. Дар ин хусус ба АМИТ «Ховар» дар Кумитаи рушди сайёҳӣ хабар доданд.

Имрӯз дар Кумитаи рушди сайёҳии назди Ҳукумати Ҷумҳурии Тоҷикистон вохӯрии Раиси Кумита Камолиддин Муминзод бо роҳбари маҷаллаи «Diplomatic world» Барбара Дитрих баргузор гардид, ки дар ҷараёни он масъалаи тақвияти ҳамкорӣ дар самти таблиғу ташвиқи имконияти сайёҳии мамлакат баррасӣ гардид.

Зимни вохӯрӣ ҷонибҳо бобати тақвияти ҳамкорӣ дар самти таблиғу ташвиқи имконияти сайёҳии мамлакат, аз ҷумла мавзеъҳои таърихӣ, имконоти сайёҳии экологӣ ва дигар ҷолибияти сайёҳии Тоҷикистон сухан гуфтанд.

Таъкид гардид, ки нашр ва таблиғу ташвиқи пешрафту имконоти сайёҳии Тоҷикистон дар маҷаллаҳои бонуфузи байналмилалӣ сабаби ҷалби бештари таваҷҷуҳи сайёҳон ба ҷумҳурӣ мегардад.

АКС: Кумитаи рушди сайёҳии назди Ҳукумати Ҷумҳурии Тоҷикистон