Сарвари давлат Эмомалӣ Раҳмон дар деҳоти Чоряккорони ноҳияи Рӯдакӣ бинои нави истиқоматиро барои хизматчиёни ҳарбӣ ба истифода доданд

Сентябрь 8, 2023 10:50

ДУШАНБЕ, 08.09.2023. /АМИТ «Ховар»/. 8 сентябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар деҳоти Чоряккорони ноҳияи Рӯдакӣ бинои нави истиқоматиро барои хизматчиёни ҳарбӣ мавриди истифода қарор доданд.

Дар ин ҷо Президенти мамлакат муҳтарам Эмомалӣ Раҳмон нахуст калиди  хонаҳои истиқоматиро ба кормандони Шифохонаи ҳарбии Гвардияи миллии Ҷумҳурии Тоҷикистон тақдим намуданд.

Афсарон ва оилаҳои онҳо, ки дар арафаи таҷлили ҷашни бошукуҳи миллӣ – 32-солагии Истиқлоли давлатӣ соҳиби хонаҳои нави истиқоматӣ гардиданд, ба Пешвои миллат барои чунин ғамхорӣ ва дастгириҳои ҳамешагиашон изҳори сипосу миннатдорӣ намуданд.

Иншоот якҷо бо майдончаҳои варзишию бозӣ барои кӯдакон, дар масоҳати умумии беш аз 5 ҳазор метри мураббаъ бунёд гардида, аз ду ошёна, 24 хона ва дигар биноҳои ёрирасон иборат мебошад.

Корҳои сохтмонӣ дар иншооти мазкур соли 2019 бо ҷалби беш аз 70 нафар коргарону мутахассисони маҳаллӣ оғоз гардида буд. Имрӯз бинои нав дар вазъияти тантанавӣ бо сифати баланду ҷавобгӯ ба талаботи меъморию сохтмонӣ мавриди истифода қарор гирифт, ки барои хизматчиёни ин ниҳоди ҳарбӣ туҳфаи арзандаи ҷашнӣ ба шумор меравад.

Дар бинои нави истиқоматӣ маҷмуан 16 хонаи як ҳуҷрагӣ ва 8 хонаи ду ҳуҷрагӣ ҷойгир аст, ки ҳар яки онҳо пурра бо дастгоҳу таҷҳизоти замонавӣ ва ҷиҳози рӯзгор таъмин мебошанд.

Маҳз бо дастгирӣ ва ғамхориҳои ҳамешагии Пешвои муаззами миллат муҳтарам Эмомалӣ Раҳмон дар давоми 20 соли охир наздик ба 500 корманди Гвардияи миллии Ҷумҳурии Тоҷикистон бо хонаҳои истиқоматии хизматӣ таъмин шуданд ва имрӯз барои ҳимояи давлати соҳибистиқлол содиқона хизмат менамоянд.

Сарвари давлат муҳтарам Эмомалӣ Раҳмон зимни шиносоӣ бо шароити фароҳамгардидаи бинои нави хизматӣ ва суҳбати самимӣ бо хизматчиёни Гвардияи миллӣ, ки имрӯз барои ҳифзи марзу буми Ватан ва солимии ҷомеа дар Шифохонаи ҳарбӣ содиқонаю ҷавонмардона хизмат ва кору фаъолият доранд таъкид намуданд, ки беҳтар сохтани инфрасохтори зарурӣ ва таъмини шароити арзандаи зиндагӣ ба кормандони  сохторҳои ҳарбӣ ҳамеша дар маркази таваҷҷуҳи Давлат ва Ҳукумати мамлакат қарор дошта, дар ин самт марҳила ба марҳила  тадбирҳои муҳим амалӣ карда мешавад.

Дар саҳни бинои навтаъсис барои машғулияти афсарони Шифохонаи ҳарбии Гвардияи миллӣ майдончаи варзишии бозии футболи хурд, волейбол, баскетбол ва майдончаи бозӣ барои кӯдакон бо тамоми таҷҳизоти зарурӣ сохта шудааст, ки минбаъд дар ин ҷо истиқоматкунандагон метавонанд дар баробари ба намудҳои гуногуни варзиш машғул шудан ҳамзамон истироҳати худро комил созанд.

Дар идомаи корҳои сохтмонӣ барои пурра дар фасли зимистон таъмин намудани бино ва хонаҳои истиқоматӣ бо гармӣ иншооти махсус таҷҳизоти муосири электрикии каммасраф насб шудааст.

Маврид ба таъкид аст, ки 24 афсаре, ки соҳиби хонаҳои хизматӣ шуданд, имрӯз дар Шифохонаи ҳарбии Гвардияи миллӣ фаъолият намуда, саҳми онҳо дар ҳифзи солимии ҷомеа, аз ҷумла пешгирӣ ва табобати бемориҳои гуногун назаррас аст.

Дар замони Истиқлоли давлатӣ бо таваҷҷуҳ ва дастгириҳои пайвастаи Президенти Ҷумҳурии Тоҷикистон муҳтарам Эмомалӣ Раҳмон бинои асосӣ ва ҳуҷраҳои ёрирасони он пурра навсозӣ ва шароити хизматрасонии тиббӣ ба талаботи замон мутобиқ гардонида шудааст.

Шифохонаи ҳарбии Гвардияи миллӣ аз шуъбаҳои асаб, сироятӣ, пуст, шуъбаи бемориҳои даруна, физиотерапия, эҳёгарӣ ва дигар ҳуҷраҳои ёрирасон иборат буда, барои саривақт ба табобат фаро гирифтани беморон ва гузаронидани ҷарроҳӣ мутахассисони ботаҷриба ҷалб гардидаанд.

Ифтитоҳи бинои нави истиқоматӣ барои хизматчиёни ҳарбӣ дар деҳоти Чоряккорони ноҳияи Рӯдакӣ 08.09.2023

Сентябрь 8, 2023 10:50

Хабарҳои дигари ин бахш

Президенти Ҷумҳурии Тоҷикистон Эмомалӣ Раҳмон дар ноҳияи Рӯшон аз замини наздиҳавлигии сокини деҳаи Рӯшон Додихудо Додихудоев боздид намуданд
Сарвари давлат Эмомалӣ Раҳмон дар ноҳияи Рӯшон Корхонаи маҳсулоти ширӣ ва нонии ҶДММ «Ганҷи Рӯшон»-ро мавриди истифода қарор доданд
Пешвои миллат Эмомалӣ Раҳмон дар ноҳияи Рӯшон Пайкараи Шоҳ Исмоили Сомонӣ ва майдони муқаддасоти миллиро ифтитоҳ намуданд
Президенти Ҷумҳурии Тоҷикистон Эмомалӣ Раҳмон дар ноҳияи Рӯшон гармхонаи замонавиро ифтитоҳ намуда, аз намоиши маҳсулоти кишоварзони ноҳия дидан намуданд
Сарвари давлат Эмомалӣ Раҳмон дар ноҳияи Рӯшон ба фаъолияти зеристгоҳи барқии «Ҷангал» ва 4 неругоҳи барқии обии хурд тариқи маҷозӣ оғоз бахшиданд
Оғози сафари кории Пешвои миллат Эмомалӣ Раҳмон дар ноҳияи Рӯшон
Cуханронии Президенти Ҷумҳурии Тоҷикистон, Пешвои миллат Эмомалӣ Раҳмон дар мулоқот бо роҳбарон ва фаъолони ноҳияи Дарвоз
Президенти Ҷумҳурии Тоҷикистон Эмомалӣ Раҳмон бо роҳбарону фаъолони ноҳияи Дарвоз мулоқот намуданд
Сарвари давлат Эмомалӣ Раҳмон дар ноҳияи Дарвоз аз деҳаи этнографии комплекси сайёҳии «ЗЕВ.С» дидан намуданд
Пешвои миллат Эмомалӣ Раҳмон дар ноҳияи Дарвоз ба фаъолияти комплекси сайёҳии «ЗЕВ.С» оғоз бахшиданд
Президенти Ҷумҳурии Тоҷикистон Эмомалӣ Раҳмон дар ноҳияи Дарвоз Хоҷагии моҳипарварии «Тоҷ-Корея»-ро мавриди истифода қарор доданд
Сарвари давлат Эмомалӣ Раҳмон дар ноҳияи Дарвоз маркази баҳисобгирии зеҳни сунъии «Darya AI»-ро мавриди истифода қарор доданд