Ҳайати Тоҷикистон дар ҷаласаи 69-уми Комиссияи Созмони ҷаҳонии сайёҳӣ оид ба Аврупо иштирок намуд

ДУШАНБЕ, 18.10.2023 /АМИТ «Ховар»/. 16 октябр Раиси Кумитаи рушди сайёҳии назди Ҳукумати Ҷумҳурии Тоҷикистон Камолиддин Муминзод дар 69 –умин нишасти Комиссияи Созмони умумиҷаҳонии сайёҳӣ (UNWTO) оид ба Аврупо, ки дар доираи 25 – умин Маҷмааи умумии Созмони умумиҷаҳонии сайёҳӣ (UNWTO) дар шаҳри Самарқанди Ҷумҳурии Узбекистон баргузор гардид, иштирок намуд. Дар ин хусус АМИТ «Ховар» бо истинод ба  Кумитаи мазкур хабар медиҳад.

Дар ҷаласа як қатор масъалаҳо,  аз қабили тасдиқи Барномаи корӣ ва буҷети Созмони умумиҷаҳонии сайёҳӣ барои солҳои 2024-2025, муҳокимаи рӯзномаи UNWTO барои Аврупо, таъсиси дафтари мавзӯии созмон таҳти унвони «Сайёҳӣ дар роҳи абрешим» ва дигар масъалаҳо оид ба кишварҳои Аврупо баррасӣ гардиданд.

Ёдовар бояд шуд, ки аз таснифоти давлатҳои аъзо ба минтақаҳо, ки аз ҷониби Созмони умумиҷаҳонии сайёҳӣ муайян карда шудааст, Ҷумҳурии Тоҷикистон узви Комиссияи Созмони ҷаҳонии сайёҳӣ (UNWTO) оид ба Аврупо мебошад.

АКС: Кумитаи рушди сайёҳии назди Ҳукумати Ҷумҳурии Тоҷикистон