Бахшида ба Рӯзи Созмони Милали Муттаҳид дар Осорхонаи миллии Тоҷикистон намоишгоҳ доир мешавад

ДУШАНБЕ, 23.10.2023. /АМИТ «Ховар»/. Бахшида ба Рӯзи Созмони Милали Муттаҳид, ки ҳамасола 24 октябр дар ҳама давлатҳои ҷаҳон гузаронида мешавад, пагоҳ дар Осорхонаи миллӣ бо ташаббуси Барномаи рушди Созмони Милали Муттаҳид дар Тоҷикистон ва дастгирии Ҳукумати мамлакат Намоишгоҳ оид ба ҳамкорӣ бо мақсади рушди устувор баргузор мешавад, — чунин иттилоъ доданд ба АМИТ «Ховар» дар Дафтари Барномаи Рушди Созмони Милали Муттаҳид дар Тоҷикистон.

Намоишгоҳ 24-25 октябр баргузор гардида, дар он намояндагони вазорату идораҳои давлатӣ, корпусҳои дипломатӣ, созмонҳои байналмилалӣ, намояндагони ҷомеаи шаҳрвандӣ ва воситаҳои ахбори омма иштирок менамоянд. Барои оммаи васеъ тамошои намоишгоҳ аз соати 12:00-и 24 октябр то соати 15:00-и 25 октябр муайян гардидааст.

Дар намоишгоҳ аксҳо оид ба ҳамкории Ҳукумати Ҷумҳурии Тоҷикистон бо Созмони Милали Мутаҳид давоми 30 сол ба намоиш гузошта мешаванд, ки мавзуъҳои ҳамкорӣ бо Ҳукумати мамлакат, дастгирии ташаббусҳои ҷаҳонӣ, инчунин бахшҳои об, пиряхҳо, коҳиш додани офатҳои табиӣ, рушди иҷтимоӣ, иқтисоди «сабз», баробарии гендерӣ, ҳуқуқи инсон, баробарӣ, инноватсия ва дигар паҳлуҳои ҳамкории созандаро инъикос менамоянд.

Ҳамчунин дар назар дошта шудааст, ки оид ба тағйирёбии иқлим, устувории экологӣ, муҳоҷирати бехатар ҷаласаҳои алоҳида гузаронида шуда, мактаби фаъолони гендерӣ, маҷмуи таълимот оид ба амалҳои гендерӣ, муколамаи ҷавонон, таҳсили шахсони дорои имконияти маҳдуд (маъюбон) муаррифӣ шаванд.

Тавре ба АМИТ «Ховар» иттилоъ дода шуд, дигар чорабиниҳо вобаста ба муаррифии фаъолияти Созмони Милали Муттаҳид дар Тоҷикистон то охири сол идома ёфта, дар доираи онҳо баргузор намудани мулоқот бо донишҷӯёни донишгоҳҳои мамлакат баҳри муҳокимаи рушди устувор ва конфронси мавзуӣ дар назар дошта шудааст.

АКС: АМИТ «Ховар»