Байни Донишгоҳи давлатии омӯзгории Тоҷикистон ва Донишкадаи омӯзгории Арқалиқи Қазоқистон созишномаи ҳамкорӣ ба имзо расонида шуд

ДУШАНБЕ, 20.10.2023. /АМИТ «Ховар»/. Байни Донишгоҳи давлатии омӯзгории Тоҷикистон ба номи Садриддин Айнӣ ва Донишкадаи омӯзгории Арқалиқ ба номи И.Олтинсарини Ҷумҳурии Қазоқистон ба таври маҷозӣ созишномаи ҳамкорӣ ба имзо расонида шуд. Дар ин хусус ба АМИТ «Ховар» дар Донишгоҳи давлатии омӯзгории Тоҷикистон хабар доданд.

Созишномаи ҳамкорӣ байни ректори Донишгоҳи давлатии омӯзгории Тоҷикистон ба номи Садриддин Айнӣ, профессор Аҳлиддин Ибодуллозода ва ректори Донишкадаи омӯзгории Арқалиқ ба номи И.Олтинсарин, профессор Эржан Эмирбекули дар шакли маҷозӣ ба имзо расонида шуд.

Ҳадафи созишнома   рушди табодули таҷрибаомӯзии омӯзгорон ва ба таҳсил фаро гирифтани донишҷӯён, фаъолияти муштараки илмӣ, ташкил ва баргузор намудани конференсияҳо, нашри маводи илмӣ ва дигар фаъолияти ҷонибҳо мебошад.

Донишгоҳи давлатии омӯзгории Тоҷикистон ба номи Садриддин Айнӣ феълан бо 104 муассисаи олӣ ва олии касбии ватаниву хориҷӣ дар самти илмиву таълимӣ ва мубодилавию фарҳангӣ ҳамкории судмандро амалӣ намуда, тасмим гирифтааст, ки дар оянда ҳамкориро бо муассисаҳои бунуфузи дунё тавсеа бахшад.

АКС: Донишгоҳи давлатии омӯзгории Тоҷикистон ба номи Садриддин Айнӣ