Дар Душанбе масоили мубрами назария ва амалияи таҳқиқоти педагогӣ ва дурнамои рушди он баррасӣ гардид

ДУШАНБЕ, 20.10.2023. /АМИТ «Ховар»/. Бо ташаббуси Пажуҳишгоҳи рушди маориф ба номи Абдураҳмони Ҷомӣ дар толори Академияи таҳсилоти Тоҷикистон таҳти унвони «Масъалаҳои мубрами назария ва амалияи таҳқиқоти педагогӣ: дурнамои рушди он дар замони муосир» конференсияи байналмилалии илмӣ-назариявӣ баргузор гардид. Дар ин хусус ба АМИТ «Ховар» дар маркази матбуоти Вазорати маориф ва илми Тоҷикистон хабар доданд.

Дар конференсия тазаккур дода шуд, ки амалӣ сохтани тамоми иқдом, аз ҷумла баргузории конфренсияҳои сатҳи байналмилаливу ҷумҳуриявӣ дар самти рушди илму маориф, баланд бардоштани сатҳу сифати таълим ва тарбияи кадрҳои ба талаботи замон ҷавобгӯ, баланд бардоштани мақоми омӯзгор, таҳияи маводи таълимӣ, заминаҳои методии инкишофи таҳқиқот дар педагогика ва татбиқи муносибати босалоҳият дар раванди таълим омилҳои таъсиррасон дар рушди соҳаи маориф ба шумор мераванд.

Ёдовар мешавем, ки дар оғози конференсия дар бинои Пажуҳишгоҳи рушди маориф «Маркази омӯзиши осори Пешвои миллат» мавриди баҳрабардорӣ қарор гирифт.

Дар маҷмуъ, ба конференсия мақолаву маърузаҳои зиёд пешниҳод гардиданд, ки дар шакли китоби алоҳида ба чоп мерасанд.

АКС: Маркази матбуоти Вазорати маориф ва илми Ҷумҳурии Тоҷикистон