Дар шаҳри Хуҷанд Лоиҳаи Рушди нақлиёти ҷамъиятӣ татбиқ мегардад

ДУШАНБЕ, 12.10.2023 /АМИТ «Ховар»/. Бо мақсади беҳтар намудани хизматрасонии нақлиёти ҷамъиятӣ дар шаҳри Хуҷанд тадбирҳои мушаххас андешида шуда, дар ин самт лоиҳаи соҳавӣ татбиқ мешавад.​ Ҳамарӯза ба бошандагони шаҳри мазкур ва атрофи он то 30 нақлиёт хизмат мерасонанд. Дар оянда шумораи автобус ва хатсайрҳо зиёд шуда, дар назар аст, ки барои беҳтар намудани хизматрасонӣ инчунин 20 электробус ворид гардад. Дар ин хусус АМИТ «Ховар» бо истинод ба Хадамоти матбуоти Раиси шаҳри Хуҷанд хабар медиҳад.

Раиси вилояти Суғд бо ҷараёни корҳои ободониву созандагӣ ва васлу насби дастгоҳу таҷҳизоти муосир дар Корхонаи воҳиди давлатии комуналии «Нақлиёти мусофиркашони шаҳри Хуҷанд» шинос гардид.​ Зимни шиносоӣ ба роҳбари вилоят иттилоъ дода шуд, ки дар айни замон татбиқи лоиҳаи «Рушди нақлиёти ҷамъиятӣ дар шаҳри Хуҷанд» идома дошта, то ин марҳила беш аз 50 дарсади корҳо ба сомон расонида шудаанд. Лоиҳа бо дастгирии Бонки Аврупоии Таҷдид ва Рушд амалӣ гашта, зиёда аз 100 автобуси мусофиркашон ворид гардид ва системаи пардохти корти нақлиётӣ ба кор андохта шудааст.​

Дар доираи ин лоиҳа тамоми ҳудуди корхонаи мазкур навсозӣ гашта, дастгоҳу таҷҳизоти ба талаботи замони муосир ҷавобгӯ ворид мешаванд. Дар айни замон корҳои ободониву бунёдкорӣ дар ин мавзеъ босуръат идома дошта, сохтмони якчанд иншоот ба роҳ монда шудааст.

Мувофиқи нақша, бунёди 13 коргоҳи истеҳсолӣ ва таъмирӣ, нуқтаи таъмини сӯзишворӣ, шустушӯи нақлиёт, назорати даромаду баромади нақлиёти мусофиркашон ва фаъолияти муназзами он дар хатсайрҳо, ошхона, сехи рангуборкунӣ, чоҳи зеризаминӣ, ҳавзи захираи об барои сӯхторнишонӣ бунёд ёфта, ҳудуди муассиса пурра мумфарш ва тамоми бино ба низоми ягонаи гармидиҳӣ пайваст мегардад. Дастгоҳу таҷҳизот аз Чин, Туркия ва Русия ворид гардида, имкон медиҳанд, ки дар самти фаъолияти муассиса дигаргунии ҷиддӣ ва ҷавобгӯ ба талаботи замон ҷорӣ гардад.

Таъкид шуд, ки ин лоиҳа бо дастгирии Ҳукумати мамлакат амалӣ ​ шуда, ҳадафи он хизматрасонии босифат ба аҳолӣ ба ҳисоб меравад.​

Ҳамзамон ҷиҳати назорати қатъии корҳои сохтмонӣ, воридоти дастгоҳу таҷҳизоти замонавӣ, сари вақту босифат ба итмом расонидани тамоми корҳо, мақсаднок истифода бурдани маблағҳои грантӣ ва назорати сарфаи он ба масъулин дастуру супоришҳои мушаххас дода шуд.

Гуфта шуд, ки бояд ҳамаи нақлиёти мусофиркашон дар ҳолати коршоямӣ қарор дошта, хатсайри автобусҳо дар асоси талабот ва зиёд гаштани аҳолӣ зиёд шавад.

АКС: Хадамоти матбуоти Раиси шаҳри Хуҷанд