Донишгоҳи миллии Тоҷикистон бо донишгоҳҳои бонуфузи Покистон барои табодули таҷриба ҳамкориро густариш медиҳад

ДУШАНБЕ, 11.10.2023. /АМИТ «Ховар»/. Роҳбарияти Донишгоҳи миллии Тоҷикистон  тасмим гирифтаанд, ки олимони варзидаи донишгоҳҳои бонуфузи Покистонро барои  машғулияти таълимии донишҷӯён ва мубодилаи таҷриба бо устодон ҳавасманд намоянд. Ин нукта зимни мулоқоти Ректори Донишгоҳи миллии Тоҷикистон, профессор Қобилҷон Хушвахтзода бо доктор, раиси Донишкадаи исломии Ҷумҳурии Исломии Покистон Соҳибзода Султон Аҳмад Алӣ баррасӣ гардид, иттилоъ доданд ба АМИТ «Ховар» дар донишгоҳи мазкур.

Зимни мулоқот ҷонибҳо дар самти ҳамкории илмию таълимӣ табодули афкор намуда, таъкид доштанд, ки ин вохӯрӣ ба ҳамкории минбаъда мусоидат менамояд.

Ҳамзамон доктор Соҳибзода Султон Аҳмад Алӣ бо устодону донишҷӯёни факултети забонҳои Осиё ва Аврупо мулоқот намуд. Гуфта шуд, ки маҳз баҳри тақвияти муносиботи давлатҳо дар асоси баробар ва эътирофи мунфиатҳои мутақобила Ҷумҳурии Исломии Покистон Истиқлолияти давлатии Ҷумҳурии Тоҷикистонро ба расмият шинохта, 6 июни соли 1992 бо он муносибатҳои дипломатӣ барқарор намуд.

АКС: Донишгоҳи миллии Тоҷикистон