Хобгоҳи мактаб-интернати шаҳри Роғун ба номи Саида Давлатзода ба истифода дода шуд

ДУШАНБЕ, 18.10.2023. /АМИТ «Ховар»/. 17 октябр хобгоҳи мактаб -интернати  шаҳри Роғун ба номи Саида Давлатзода ба истифода дода шуд. Хобгоҳи мазкур ба маблағи зиёда аз 15 миллион сомонӣ аз ҷониби соҳибкори ватанӣ Шерзод Давлатзода барои 112 нафар тарбиятгиранда сохта шудааст. Дар ин хусус ба АМИТ «Ховар»  дар  маркази матбуоти Вазорати маориф ва илми Ҷумҳурии Тоҷикистон   хабар доданд.

Хобгоҳ аз 2 ошёна иборат буда, дорои 14 ҳуҷраи хоб, 2 синфхонаи дарстайёркунӣ, 1 китобхона бо толори китобхонӣ, 1 ошхона барои 60 нафар, толори варзишӣ, 4 анбор, маҷлисгоҳ бо 140 ҷои нишаст, майдончаи варзишӣ бо тамоми таҷҳизотҳояш ва дегхонаи буғӣ мебошад.

Дар маросими баистифодадиҳии хобгоҳи мазкур гуфта шуд, ки  имрӯзҳо бо шарофати Истиқлоли давлатӣ  ва дастгириҳои ҳамешагии Асосгузори сулҳу ваҳдати миллӣ – Пешвои миллат, Президенти мамлакат  муҳтарам Эмомалӣ Раҳмон дар тамоми шаҳру ноҳияҳои мамлакат сохтмону навсозии муассисаҳои таълимӣ бомаром идома дорад, ки далели рушди соҳаи маориф ва илми ҷумҳурӣ  аст. Муҳассилинро мебояд, ки дар ҷавоб ба ин ғамхориҳо бо баҳои хубу аъло таҳсил намуда, дар оянда мутахассиони варзида шаванд, то тавонанд дар рушди Тоҷикистон  саҳми арзанда гузоранд.

Вазири маориф ва илм бо шарту шароити зисти таълимгирандагон дар хобгоҳ шинос гардида, ба сифати корҳои сохтмонӣ баҳои баланд дод ва ба тарбиятгирандагон дар таълиму тарбия муваффақият орзу намуд.

АКС: Маркази матбуоти Вазорати маориф ва илми Ҷумҳурии Тоҷикистон