Хусрав Ҳабибов: «Озмун то дараҷае шаффоф буд, ки то эълони натиҷа намедонистам, ки сазовори Шоҳҷоиза гардидаам»

ДУШАНБЕ, 17.10.2023. /АМИТ «Ховар»/. Чор сол аст, ки дар Озмуни ҷумҳуриявии «Тоҷикистон — ватани азизи ман» иштирок менамоям. Соли гузашта то даври шаҳрӣ омадам, вале ҷо нагирифтам. Танҳо сазовори ҷойи ифтихорӣ гардидам. Руҳафтода нагаштам, зеро орзу доштам, ки бо соядасти Пешвои миллат муҳтарам Эмомалӣ Раҳмон диплом дошта бошам. Талошу кӯшиши зиёд намудам, пайваста тамрин мекардаму омодагӣ медидам. Дар охир ба орзуям расидам, муваффақ шудам. Чунин гуфт овозхони Филармонияи мардумии ба номи Одина Ҳошимови ноҳияи Мир Сайид Алии Ҳамадонӣ Хусрав Ҳабибов, ки имсол аз рӯи номинатсияи «сарояндагӣ» соҳиби Шоҳҷоизаи Озмуни ҷумҳуриявии «Тоҷикистон – Ватани азизи ман» ва 50 000 сомонӣ гардид.

Хусрав Ҳабибов иброз дошт, ки озмуни мазкур дар сатҳи баланд ва хеле шаффоф гузашт. То дараҷае шаффоф буд, ки то эълони натиҷа намедонистам, ки сазовори Шоҳҷоиза гардидаам. Вақте номамро хонданд, дар ҳайрат афтодаму як ҳисси хеле аҷибе маро фаро гирифт.

— Озмуни мазкур барои дарёфти шахсони боистеъдод заминаи мусоид фароҳам овард. Дар чанд соли баргузории озмун ҷавонони зиёде дар он иштирок намуда, зина ба зина ҳунару маҳорати худро сайқал дода, дар кори худ ҷиддитар гардиданд, то ба мақсади худ бирасанд, — афзуд ӯ.

Ба гуфтаи Хусрав Ҳабибов, «дар жанри анъанавӣ сурудан, душвор аст. Чун жанри мазкур яке аз мушкилтарин жанрҳои сарояндагӣ аст ва аз овозхон маҳорату малакаи қавиро талаб мекунад. Дар ин жанр авҷҳо ва овозкашиҳои баланд аст. Он жанре ҳаст, ки шумо бо як рубоб бояд таваҷҷуҳи тамошобинро ҷалб намудаву талаботи онҳоро қонеъ карда тавонед. Ҳарчанд каме душвор бошад, агар ҳунарманд маҳорату истеъдоди хуб дошта бошад, душвории онро ҳис намекунад».

Ба довталабоне, ки дар озмунҳо муваффақ намегарданд, тавсия медиҳам, ки ҳеҷ гоҳ руҳафтода нашаванд, -мегӯяд Хусрав Ҳабибов ва таъкид намуд, ки баръакс, бо устодон тамринҳои худро зиёдтар ба роҳ монанду хатоҳоро ислоҳ намоянд. Низомномаи озмунро бодиққат хонанд ва тибқи талаботи он амал намоянд. Агар сидқан талош намоянду пайваста дар ин роҳ заҳмат кашанд, ҳатман муваффақ мегарданд.

Ҳамсуҳбати мо изҳор дошт, ки пеши худ мақсад гузоштааст, ки сурудҳои худро дар сатҳи телевизионҳо сабт намудаву манзури тамошобинон гардонад. Ҳамчунин шогирдони худро дар ин роҳ тарбия намуда, заррае ҳам бошад, дар рушди фарҳанг саҳм гузорад.

АКС: АМИТ «Ховар»