Масъалаи ҷалби соҳибкорони кореягӣ ба иқтисоди вилояти Хатлон баррасӣ гардид

Октябрь 26, 2023 16:13

ДУШАНБЕ, 26.10.2023 /АМИТ «Ховар»/. 25 октябр Раиси вилояти Хатлон бо Сафири Фавқулода ва Мухтори Ҷумҳурии Корея дар Тоҷикистон вохӯрӣ доир намуд, ки дар он оид ба  рушди муносибатҳои дуҷонибаи ду давлат ибрози назар гардид. Дар ин хусус АМИТ «Ховар» бо истинод ба  шуъбаи иттилоотию таҳлилии дастгоҳи Раиси вилояти Хатлон хабар медиҳад.

Тазаккур дода шуд, ки вилояти Хатлон яке аз минтақаҳои калонтарин ва дорои захираю имконияти васеи ҳамкорӣ дар самтҳои мухталиф буда, Мақомоти иҷроияи ҳокимияти давлатии вилояти Хатлон барои рушди соҳибкорӣ,  махсусан барои соҳибкорони хориҷӣ тамоми шароити заруриро муҳайё намудааст.

Таҳлили раванди ҳамкории дуҷонибаи Тоҷикистон ва Корея нишон медиҳад, ки сол то сол муносибатҳо рушд меёбанд. Асоси гуфтаҳои боло- ин татбиқи сиёсати хирадмандонаи Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошад, ки имрӯз Тоҷикистонро дар арсаи байналмилалӣ ҳамчун давлати сулҳофар, ором ва меҳмоннавоз мешиносанд.

Иброз гардид, ки бо мусоидати Сафорати Корея дар Тоҷикистон ба ҷумҳурӣ, аз ҷумла вилояти Хатлон гурӯҳҳои мухталифи соҳибкорону сармоягузорон меоянд. Айни ҳол дар Минтақаи озоди иқтисодии «Данғара» яке аз корхонаи калонтарин оид ба истеҳсоли панелҳои офтобӣ, ки аз ҷониби сармоягузорони кореягӣ маблағгузорӣ мегардад, сабти ном шудааст.

Дар идомаи мулоқот масъалаҳои муҳими ҳамкорӣ дар самти рушди муносибатҳои байналмилалӣ, иқтисодию тиҷоратӣ, саноат ва кишоварзӣ, маориф, ҷалби соҳибкорони кореягӣ ба иқтисоди вилояти Хатлон, таҳкими муносибатҳои дӯстона байни минтақаву вилоятҳои ду давлат, сайёҳӣ, таъсиси корхонаҳои муштарак ва дигар мавзуъҳои мавриди таваҷҷуҳ муҳокима шуданд.

Ҳамзамон Сафири Фавқулода ва Мухтори Ҷумҳурии Корея дар Тоҷикистон баён дошт, ки барои қисмҳои эҳтиётии тайёраи офтобӣ лоиҳаи бузургеро амалӣ менамоем, ки дар марҳилаи аввал то 3000 нафар бо ҷои кор таъмин мешаванд.

Инчунин гуфта шуд, ки ҷониби Корея мехоҳад лоиҳаеро дар самти кишоварзӣ, махсусан ниҳолшинонӣ амалӣ намояд, зеро дар ин давлат ҳар сол ҷашни ниҳолшинонӣ доир мешавад, ки ҳадафи он тоза намудани табиат мебошад.

Иттилоъ дода шуд, ки бо мақсади рушди ҳамкории байниминтақавӣ, ҷалби сармояи хориҷӣ ва бунёди корхонаҳои муштарак лоиҳаи Ёддошти тафоҳум байни вилояти Хатлон ва вилояти Канвондои Ҷумҳурии Корея оид ба ҳамкории тиҷоратию иқтисодӣ, кишоварзӣ, сайёҳӣ ва гуманитарӣ аз расмиёти дохилидавлатӣ гузаронида шуда, тариқи роҳҳои дипломатӣ ба ҷониби вилояти Канвондо равон гардидааст.

АКС: Шуъбаи иттилоотию таҳлилии дастгоҳи Раиси вилояти Хатлон

Октябрь 26, 2023 16:13

Хабарҳои дигари ин бахш

Татбиқи тарҳи «CASA-1000» намунаи ҳамкории энергетики минтақавӣ мебошад
Ҷаласаи сеюми Комиссияи байниҳукуматии Тоҷикистону Ҷопон баргузор гардид
Байни «Амонатбонк» ва Федератсияи футболи Тоҷикистон шартномаи ҳамкорӣ ба имзо расид
Дар доираи ҳамкории Тоҷикистон бо Фонди байналмилалии рушди кишоварзӣ академияи бонкӣ таъсис дода мешавад
Харитаи роҳи Ҳадафи 7-уми Рушди Устувор барои Тоҷикистон расман оғоз гардид
«Тоҷик Эйр» дар масири Душанбе-Ванҷ-Душанбе аввалин парвози ҳавоиро анҷом дод
Масъалаҳои муҳими марбут ба пешгирии хавфҳои ҷойдошта дар ҷаласаи Шурои комплаенс баррасӣ гардиданд
Дар шаҳри Истаравшан 20 навъи ангур парвариш меёбад
Байни Тоҷикистон ва Бонки осиёии сармоягузориҳои инфрасохторӣ Созишномаи грантӣ ба имзо расид
Масъалаи таҳкими ҳамкорӣ байни мақомоти гумруки Тоҷикистон ва Агентии ҳамкории байналмилалии Корея баррасӣ гардид
Тоҷикистон расман мақоми нозириро дар Маркази бисёрҷонибаи ҳамкории маблағгузории рушд соҳиб шуд
Дар ноҳияи баландкӯҳи Мурғоб се неругоҳи барқи офтобӣ ба истифода дода мешавад