«МО ҲОМИИ ВАТАН!». Ба ифтихори Рӯзи даъватшаванда дар ноҳияи Ёвон роҳпаймоии ҷавонон ва хизматчиёни ҳарбӣ баргузор шуд

ДУШАНБЕ, 03.10.2023. /АМИТ «Ховар»/. Ба ифтихори Рӯзи даъватшаванда дар ноҳияи Ёвон роҳпаймоии ҷавонон, хизматчиёни ҳарбӣ, даъватшавандаҳо ва донишҷӯёни муассисаҳои миёнаи касбӣ таҳти унвони «Мо ҳомии Ватан!» баргузор гардид. Дар ин хусус ба АМИТ «Ховар» дар Мақомоти иҷроияи ҳокимияти давлатии ноҳияи Ёвон хабар доданд.

Ҳамзамон дар саҳни Кохи фарҳанг бо иштироки Раиси ноҳияи Ёвон Бахтиёр Шарифӣ, намояндаи Ҳукумати Ҷумҳурии Тоҷикистон, роҳбарони мақомоти ҳифзи ҳуқуқ, собиқадорони меҳнат, сарбозону афсарон, волидони даъватшавандаҳо ба муносибати Рӯзи даъватшаванда ҷамъомади тантанавӣ доир шуд.

Изҳор шуд, ки баргузории Рӯзи даъватшаванда- ин арҷ гузоштан ба марзу буми аҷдодӣ, Артиши миллӣ ва пурра намудану таҳким бахшидани сафҳои Қувваҳои Мусаллаҳи Ватани азизамон мебошад. Вақте мебинем, ки фарзандони мо ба монанди падарони боору номуси худ бо ғайрату ҷасорат ба хотири ободии Ватан хизмати ҳарбиро ихтиёр менамоянд, умед ва бовариямон ба насли наврас, ба ояндаи орому осоишта қавитар мегардад.

Модарону хоҳарон мувофиқи расму оини тоҷикӣ ба наваскароне, ки хизмати Ватанро ихтиёр намудаанд, нон газонида, ба онҳо садоқату вафодорӣ ва хизмати сарбаландона орзу намуданд.

Дар ҷараёни ҳамоиш ба даъватшавандаҳое, ки ба таври ройгон дар даврҳои ронандагии назди Ташкилоти мададгори мудофиа таҳсил намудаанд, шаҳодатномаҳои ронандагии дараҷаи «Б» ва «С» супорида шуд.

Ҳамоиши пуршукуҳи ҷавонони ноҳияи Ёвон гувоҳи он буд, ки онҳо хизмат ба Ватан ва гузаштан аз мактаби мардонагиро барои худ мояи шараф ва ифтихор медонанд.

АКС: Мақомоти иҷроияи ҳокимияти давлатии ноҳияи Ёвон