Президенти Тоҷикистон Эмомалӣ Раҳмон дар ноҳияи Муъминобод Корхонаи истеҳсоли картошкаи хушк (чипс) ва маҳсулоти шириро ифтитоҳ намуданд

Октябрь 21, 2023 10:10

ДУШАНБЕ, 21.10.2023. /АМИТ «Ховар»/. 21 октябр Асосгузори сулҳу ваҳдати миллӣ–Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар деҳаи Шаҳринави поёни деҳоти Деҳибаланди ноҳияи Муъминобод Корхонаи истеҳсоли картошкаи хушк (чипс) ва маҳсулоти шириро мавриди баҳрабардорӣ қарор дода, бо намоишгоҳи маҳсулоти саноатӣ шинос шуданд.

Корхонаи истеҳсоли картошкаи хушк дар доираи нақшаи чорабиниҳои ҷашнӣ ба истиқболи 35-солагии Истиқлоли давлатии Ҷумҳурии Тоҷикистон “Солҳои рушди саноат” ва ҷиҳати татбиқи ҳадафҳои саноатикунонии босуръати мамлакат аз тарафи ҶДММ “Заркорон”бунёд ва мавриди баҳрабардорӣ қарор дода шуд.

Иқтидори истеҳсолии корхонаи нави саноатӣ дар ноҳияи Муъминобод коркарди 20 тонна картошка дар як шабонарӯз ва истеҳсоли 8 тонна картошкаи бирён (чипс) мебошад. Арзиши лоиҳавии корхонаи нав 1 миллион сомонӣ буда, хати технологӣ аз Ҷумҳурии Мардумии Чин ворид шудааст.

Бартарии корхона дар он аст, ки маҳсулот бо истифода аз картошкаи тозаи маҳаллӣ истеҳсол мешавад ва бо сифати баланду рақобатпазир буданаш воридотивазкунанда низ мебошад. Дар як баст дар корхонаи нав барои 20 нафар ҷойи корӣ фароҳам оварда шуд. Дар натиҷаи мавқеи устувор касб намудан дар бозори истеъмолӣ ва дар се баст амалӣ намудани фаъолият дар корхона то 60 нафар бо ҷойи кор ва маоши хуб таъмин мешаванд.

Пешвои миллат муҳтарам Эмомалӣ Раҳмон аснои шиносоӣ бо фаъолияти иқтидори нави саноатӣ масъулонро барои тавсеаи бештари истеҳсолот вазифадор намуда, дастур доданд, ки маҳсулоти маҳаллӣ, аз ҷумла картошка мавриди коркарди ниҳоӣ қарор дода шавад.

Бояд гуфт, ки дар моҳҳои январ-сентябри соли 2023 дар мамлакат 6 корхонаи истеҳсоли картошкаи хушк (чипс) ба қайд гирифта шудааст. Дар 9 моҳи соли равон ин корхонаҳо дар ҳаҷми 41,4 тонна маҳсулот истеҳсол намудаанд, ки нисбат ба ҳамин давраи соли 2022 9,6 тонна зиёд буда, суръати афзоиш 130,1 фоизро ташкил медиҳад.

Дар Коргоҳи маҳсулоти ширии ҶДММ “Заркорон”, ки бо иштироки Сарвари давлати Тоҷикистон муҳтарам Эмомалӣ Раҳмон мавриди истифода қарор дода шуд, 10 нафар бо шуғл таъмин шуданд. Маҳсулоти истеҳсолшавандаи корхонаи нав ба 10 намуд мерасад. Ҷомеи меҳнатии коргоҳ ҷурғоту қаймоқ, сметану творог, равғани маска ва чаккаву дӯғи аз лиҳози экологӣ тозаро тавассути дастгоҳҳои пешрафтаи соҳавӣ истеҳсол намуда, бо сифати баланд пешниҳоди харидорон мегардонанд.

Иқтидори истеҳсолии корхона коркарди 44 тонна шир дар як моҳ буда, арзиши лоиҳавии он 2,9 миллион сомонӣ мебошад. Хати технологии Корхонаи маҳсулоти ширии ҶДММ “Заркорон” аз Ҷумҳурии Мардумии Чин ворид шудааст. Бо ба фаъолият оғоз намудани Фермаи ширии ҶДММ “Заркорон” ҳаҷми воридоти шир ба корхона бештар ва номгӯи маҳсулоти истеҳсолӣ низ афзоиш дода мешавад.

Баъд аз шиносоӣ бо шароити корӣ дар Корхонаи истеҳсоли картошкаи хушк ва маҳсулоти ширии ҶДММ «Заркорон» Президенти Ҷумҳурии Тоҷикистон муҳтарам Эмомалӣ Раҳмон аз ташаббуси соҳибкорони маҳаллӣ изҳори хушнудӣ намуда, барои афзун намудани ҳаҷми истеҳсолот дар корхона ва таъсис додани ҷойҳои нави корӣ ба онҳо дастуру ҳидоятҳо доданд.

Ҳамчунин Роҳбари давлати Тоҷикистон муҳтарам Эмомалӣ Раҳмон дар ҳамин ҷо бо намоишгоҳи маҳсулоти саноатии корхонаҳои ҶДММ “Заркорон” шинос шуданд. Дар намоишгоҳи саноатӣ бештар аз 20 намуд консерваи меваю сабзавот, нӯшобаву шарбат, 10 намуди маҳсулоти ширӣ, ки ҳамагӣ дар коргоҳҳои истеҳсолии ҳамин ҷамъият истеҳсол шудаанд, ба намоиш гузошта шуданд.

Ифтитоҳи Корхонаи истеҳсоли картошкаи хушк (чипс) ва маҳсулоти ширӣ аз ҷониби ҶДММ «Заркорон» дар ноҳияи Муъминобод 21.10.2023

Октябрь 21, 2023 10:10

Хабарҳои дигари ин бахш

Барномаи рушди иҷтимоию иқтисодии Левакант 91,4 фоиз иҷро гардидааст
Дар осоишгоҳи «Бунёд»-и ноҳияи Ашт шароити хуби ташхису табобати беморон фароҳам оварда мешавад
Варзишгарони шаҳри Ҳисор соли 2025 соҳиби беш аз 340 медали тилло гардиданд
Беш аз 3 километр роҳҳои дохили Ҷамоати деҳоти Палдораки ноҳияи Мастчоҳ мумфарш карда мешавад
Президенти Ҷумҳурии Тоҷикистон Эмомалӣ Раҳмон бо Президенти Федератсияи Русия Владимир Путин суҳбати телефонӣ анҷом доданд
Дар шаҳри Панҷакент бинои нуҳошёнаи истиқоматӣ ба истифода дода шуд
Президенти Ҷумҳурии Тоҷикистон Эмомалӣ Раҳмон ба Сарвазири Ҷумҳурии Арманистон Никол Пашинян барқияи табрикӣ ирсол намуданд
Президенти Ҷумҳурии Тоҷикистон Эмомалӣ Раҳмон ба Президенти Ҷумҳурии Озарбойҷон Илҳом Алиев барқияи табрикӣ ирсол намуданд
35-СОЛАГИИ ИСТИҚЛОЛИ ДАВЛАТӢ. Дар Хатлон 1411 иншоот ба истифода дода шуд
Сарвазири Тоҷикистон Қоҳир Расулзода бо бунёди хонаҳои истиқоматӣ дар ноҳияҳои Тоҷикободу Рашт шинос гардид
Академик Фарҳод Раҳимӣ: «Истиқлол фалсафаи ҳастии давлатдории имрӯзаи тоҷикон аст»
Дар шашмоҳаи якуми соли 2025 дар ноҳияи Ёвон 484 иншоот ба истифода дода шуд