Раиси вилояти Хатлон дар Мамнуъгоҳи табиии давлатии «Даштиҷум» бо ҳолати парваришгоҳҳо шинос шуд

ДУШАНБЕ, 27.10.2023. /АМИТ «Ховар»/. Тавре қаблан хабар додем, 26 октябр Раиси вилояти Хатлон Давлаталӣ Саид ба Мамнуъгоҳи табиии давлатии «Даштиҷум»-и ноҳияи Шамсиддини Шоҳин сафар намуда,  бо парваришгоҳи бузи кӯҳии пармашох, парваришгоҳи гӯсфанди кӯҳии бухороӣ, боғи навбунёди анор ва дигар мавзеъҳои парваришгоҳ шинос шуд ва дар ин ҷо дарахти ҳамешасабз — арча шинонида шуд.

Иттилоъ дода шуд, ки Мамнуъгоҳи табиии давлатии «Даштиҷум» 7 сентябри соли 1983 бо мақсади ҳифзу нигоҳдорӣ ва афзунгардонии саршумори намудҳои нодир ва дар ҳолати маҳвшавӣ қарордоштаи олами ҳайвонот ташкил шудааст.

Масоҳати мамнуъгоҳ 19 700 га буда, дар қисмати ҷанубу шарқии Тоҷикистон, дар доманакӯҳи Ҳазрати Шоҳ, дар ҳудуди ноҳияи Шамсиддини Шоҳин ташкил шудааст.

Дар мамнуъгоҳ зиёда аз 850 намуди набототи гуногун мавҷуд буда, аз онҳо 100 намудашон растаниҳои эндоникӣ (маҳаллӣ) мебошанд.

Ҳамчунин 5 синфи ҳайвоноти сутунмуҳрадор мавҷуд мебошанд, ки ба 22 қатор ва 233 намуд ҷудо мешаванд. Аз ин миқдор, ба синфи ширхӯрон 52 намуд ва ба синфи парандагон 139 намуд, ба хазандагон 18 намуд ва ба синфи моҳиён 5 намуд дохил мешаванд.

Бояд ёдовар шуд, ки аз ин намудҳо ба китоби Сурхи Ҷумҳурии Тоҷикистон 17 намуди ҳайвоноти мамнуъгоҳ дохил шудааст.

Олами ҳайвоноти бесутунмуҳра (ҳашарот) зиёда аз 3000 намудро дар бар мегирад.

Солҳои охир дар ҳудуди мамнуъгоҳ 2 парваришгоҳ барои нигоҳубин ва парвариши бузи пармашох ва гӯсфанди кӯҳӣ (уриял) ва парваришгоҳи анори бедона кушода шудааст.

Раиси вилоят Давлаталӣ Саид зимни шиносоӣ ба фаъолияти минбаъдаи масъулону кормандони мамнуъгоҳ муваффақият хоста, барои боз ҳам тақвият додани корҳо дастуру супоришҳо дод.

АКС: Шуъбаи иттилоотию таҳлилии дастгоҳи Раиси вилояти Хатлон