Ассотсиатсияи футболи Осиёи Марказӣ беҳтарин федератсияи минтақавии сол дар Осиё эътироф гардид

ДУШАНБЕ, 02.11.2023. /АМИТ «Ховар»/. Ассотсиатсияи футболи Осиёи Марказӣ таҳти роҳбарии Президенти Ассотсиатсия муҳтарам Рустами Эмомалӣ беҳтарин ассотсиатсияи минтақавии сол дониста шуд. Дар ин хусус АМИТ «Ховар» бо истинод ба Федератсияи футболи Тоҷикистон хабар медиҳад.

Маросими тантанавии ҷоизасупории Конфедератсияи футболи Осиё 31 октябр дар пойтахти Қатар- шаҳри Давҳа баргузор шуд.

CAFA соли 2015 таъсис ёфта, ҷавонтарин Ассотсиатсияи минтақавии Конфедератсияи футболи Осиё мебошад. Қобили тазаккур аст, ки таҳти сарпарастии CAFA дар давраи ҳисоботӣ – аз моҳи январи соли 2022 то апрели соли равон ёздаҳ мусобиқа, аз ҷумла барои ҷавонон ва занон баргузор гардиданд. Дар ин муддат аз 11 мусобиқа 9-тоаш дар Тоҷикистон гузаронида шуд.

Ёдовар мешавем, ки ба Ассотсиатсияи футболи Осиёи Марказӣ (CAFA) Федератсияи футболи шаш давлат – Тоҷикистон, Афғонистон, Эрон, Қирғизистон, Узбекистон ва Туркманистон шомил мебошад. Қароргоҳи CAFA аз соли 2019 дар Душанбе ҷойгир аст.

АКС: Федератсияи футболи Тоҷикистон