«БО ПЕШВОИ МИЛЛАТЕМ!». Таҳти чунин унвон дар Душанбе бахшида ба Рӯзи Президенти Ҷумҳурии Тоҷикистон барномаи фарҳангӣ доир шуд

ДУШАНБЕ, 15.11.2023. /АМИТ «Ховар»/. Имрӯз бахшида ба Рӯзи Президенти Ҷумҳурии Тоҷикистон ва 31-солагии Иҷлосияи таърихии XVI Шурои Олии Ҷумҳурии Тоҷикистон дар «Кохи Суруш»-и пойтахт бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон таҳти унвони «Бо Пешвои миллатем!» барномаи фарҳангии идона баргузор гардид, хабар медиҳад хабарнигори АМИТ «Ховар».

Зимни ифтитоҳи барномаи фарҳангӣ муовини Сарвазири Ҷумҳурии Тоҷикистон Матлубахон Сатториëн вобаста ба нақши Президенти Ҷумҳурии Тоҷикистон муҳтарам Эмомалӣ Раҳмон  дар татбиқи босамари сиёсати давлатии ҷавонон сухан гуфт.

Матлубахон Сатториëн изҳор дошт, ки Ҳукумати мамлакат, махсусан Президенти Ҷумҳурии Тоҷикистон муҳтарам Эмомалӣ аз лаҳзаҳои аввали ба даст овардани соҳибистиқлолӣ то имрӯз ба масъалаи ҷавонон таваҷҷуҳи зиёд доранд. Маҳз ҳамин таваҷҷуҳ нисбат ба ҷавонон буд, ки пас аз шаш моҳи соҳибистиқлолӣ 13 марти соли 1992 Қонуни Ҷумҳурии Тоҷикистон «Дар бораи сиёсати давлатии ҷавонон» ба тасвиб расида, 17 марти соли 1994 нахустин мулоқоти расмии Президенти Ҷумҳурии Тоҷикистон муҳтарам Эмомалӣ Раҳмон бо ҷавонон доир гардид.

Тазаккур дода шуд, ки ҷавонони ҷумҳурӣ бояд ҳисси баланди миллӣ дошта, бо Ватан, миллат, давлати соҳибистиқлол ва Пешвои худ, инчунин забону фарҳанги миллии хеш ифтихор намоянду барои ҳимояи онҳо ҳамеша омода ва ҳушёру зирак бошанд. Инчунин ҷавобан ба  ғамхориҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  ҷавонони тоҷик бояд тамоми саъю талоши хешро ба донишандӯзӣ, интихоби касбу ҳунарҳои муосир, ободиву пешрафти сарзамини аҷдодӣ, ҳимояи Ватан ва рушди илму техника равона созанд.

Рӯзи Президенти Ҷумҳурии Тоҷикистон ҷашни ҳар шаҳрванди худшиносу ватандӯст ва санаи ифтихорӣ барои ҳар сокини озоду осудаи Тоҷикистони навин аст.

Дар барномаи фарҳангӣ намояндагони Дастгоҳи иҷроияи Президенти Ҷумҳурии Тоҷикистон, вакилони Маҷлиси намояндагони Маҷлиси Олӣ, роҳбарон ва намояндагони вазорату идораҳо, олимону муҳаққиқон, шоиру нависандагон, варзишгарон, ҷоизадорони мусобиқаҳои байналмилалӣ, гирандагони Стипендияи президентӣ ва ҷавонони касбу кори гуногун иштирок намуданд.

Зарангези ЛАТИФ,
Тоҳир САИД (АКС)
АМИТ «Ховар»