Дар Донишгоҳи миллии Тоҷикистон озмоишгоҳи «Конҳои канданиҳои фоиданок» таъсис ёфт

Декабрь 11, 2023 17:00

ДУШАНБЕ, 11.12.2023. /АМИТ «Ховар»/. Дар факултети геологияи Донишгоҳи миллии Тоҷикистон озмоишгоҳҳои таълимии «Конҳои канданиҳои фоиданок» ва «Гидрогеология, геологияи муҳандисӣ ва глятсиология» ифтитоҳ КАРДА ШУД, иттилоъ доданд ба АМИТ «Ховар» дар Донишгоҳи миллии Тоҷикистон.

Ин озмоишгоҳҳо дар доираи амалӣ гардидани «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» бо ибтикори ректори донишгоҳ Қобилҷон Хушвахтзода барои факултети геология таъсис ёфта, аз лиҳози сатҳи таъминот бо асбобу таҳҷизоти таълимию илмӣ дар байни мактабҳои олӣ ҷойгоҳи хосса доранд. Алҳол дар факултети геологияи Донишгоҳи миллии Тоҷикистон чор озмоишгоҳи таълимӣ ва таълимӣ-таҳқиқотӣ амал менамоянд, ки баҳри омода намудани мутахассисони самтҳои гуногуни соҳаҳои геология, кӯҳию кӯҳкорӣ ва истифодаю ҳифзи захираҳои обии мамлакат фаъолият доранд.

Таъкид шуд, ки озмоишгоҳи таълимии «Конҳои канданиҳои фоиданок» дар назди кафедраи геология ва иктишофи конҳои канданиҳои фоиданок бо асбобу таҷҳизоти замонавӣ муҷаҳҳаз гардонида шуд.

Озмоишгоҳ барои  омӯхтани сохти макроскопию микроскопии ҷинсҳои кӯҳӣ ва маъдани аз конҳои мавҷудаи ҳудуди мамлакат ва берун аз он дарёфтшуда пешбинӣ гардидааст.


Устодон ва донишҷӯён дар раванди дарсҳои амалӣ аз он васеъ истифода мебаранд. Ҳамчунин ин озмоишгоҳ барои гузаронидани таҳқиқоти геофизикӣ, усулҳои гуногуни омӯзиш ва дастрас намудани конҳои нафту газ ва конденсатҳо нақши муҳим мебозад. Дар омӯзишгоҳ инчунин аспирантон, магистрантон ва докторони Ph.D низ метавонанд бо истифода аз асбоби таҷҳизоти муҷаҳҳаз дар ин ҷо корҳои илмии хешро ба сомон расонанд.

Озмоишгоҳи таълимии «Гидрогеология, геологияи муҳандисӣ ва глятсиология» дар назди кафедраи гидрогеология ва геологияи муҳандисӣ бо асбобу таҷҳизоти муосир муҷаҳҳаз гардонида шуд. Дар ин озмоишгоҳ шогирдон аз нозукиҳои илми гидрогеология ва геологияи муҳандисӣ, яъне, таҳлили таркиби химиявӣ, микробиологӣ ва бактериологии об, омӯзиши таркибу хосиятҳои физикавию механикии грунтҳо, инчунин дигар корҳои кофтукови муҳандисии марбут ба сохтмони роҳҳо, неругоҳҳои барқию обӣ ва нақбҳои нақлиётию обкаш бархурдор мешаванд.

Озмоишгоҳҳо метавонанд дар тарбияи мутахассисони ботаҷриба, иштироки онҳо баҳри иктишоф ва истихроҷи конҳои канданиҳои фоиданоки мамлакат ва сохтмони иншооти гуногуни соҳаи геология саҳм гузоранд.

Зарангези ЛАТИФ,
АМИТ «Ховар»

 АКС: Донишгоҳи миллии Тоҷикистон

Декабрь 11, 2023 17:00

Хабарҳои дигари ин бахш

Бо мақсади таъмин намудани рушди минбаъдаи муассисаҳои таҳсилоти ибтидоӣ ва миёнаи касбӣ 300 миллион сомонӣ ҷудо карда мешавад
Академияи сайёҳии Донишгоҳи байналмилалии сайёҳӣ ва соҳибкории Тоҷикистон таъсис дода мешавад
Дастаи Донишгоҳи техникии Тоҷикистон дар Чемпионати ҷаҳонии касбӣ сазовори ҷойи якум гардид
Зиёда аз 36 ҳазор хонандагони синфҳои ибтидоии Тоҷикистон бо хӯроки гарм таъмин мегарданд
Дар Тоҷикистон Барномаи давлатии омода намудани кадрҳои омӯзгорӣ таҳия карда мешавад
Омӯзгорону хонандагони шаҳри Роғун суханронии Президенти Тоҷикистонро ба муносибати Рӯзи дониш якҷоя тамошо намуданд
Эмомалӣ Раҳмон: «Дар 34 соли соҳибистиқлолӣ ба соҳаи маориф 73,6 миллиард сомонӣ маблағгузорӣ гардидааст»
ДОНИШ — ПОЯИ МУҲИМТАРИНИ РУШДИ ДАВЛАТ ВА МИЛЛАТ. Эҳдо ба Рӯзи дониш
Дар назди 20 муассисаи таълимӣ биноҳои иловагӣ бо озмоишгоҳҳои замонавӣ сохта мешаванд
Доир ба амалисозии барномаҳои давлатии марбут ба таҳсилоти томактабӣ ҷаласаи корӣ баргузор гардид
Дар Донишгоҳи техникии Тоҷикистон Чемпионати ҷаҳонии касбӣ баргузор гардид
Дар Душанбе Озмуни ҷумҳуриявии «Барномасози ҷавон» баргузор шуд