Дар Хуҷанд дар доираи барномаи ЮНЕСКО даври омӯзишӣ баргузор гардид

ДУШАНБЕ, 21.12.2023 /АМИТ «Ховар»/. Дар шаҳри Хуҷанд таҳти унвони «Таҷдиди Феҳристи муқаддамотӣ ва арзёбии вазъи нигаҳдории ёдгориҳо бо истифода аз тарзу усулҳои пешрафтаи ҳуҷҷатикунонӣ» дар асоси лоиҳаи «Барномаи иштироки ЮНЕСКО» даври омӯзишӣ баргузор гардид. Дар ин хусус АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад. 

Ҳадаф аз баргузории даври омӯзишӣ бознигарии ёдгориҳои миллии Ҷумҳурии Тоҷикистон, ки дар Феҳристи муқаддамотии ЮНЕСКО қарор доранд ва арзёбии вазъи онҳо, инчунин таҳкими иқтидори дастурии давлат дар самти ҳифзи ёдгориҳои фарҳангӣ ва баланд бардоштани савияи дониш ва малакаи коршиносону мутахассиони маҳаллӣ нисбат ба абзорҳои дар конвенсияи дахлдори ЮНЕСКО пешбинишуда мебошад.

Дар даври омӯзишӣ 20 коршиноси маҳаллӣ аз ҳисоби мутахассисони соҳаи фарҳангу осорхонаҳо ва шаҳру навоҳии вилояти Суғд иштирок доранд.

Бо мақсади дар сатҳи шоиста гузаронидани чорабинӣ мутахассисони баландихтисос аз Институти байналмилалии тадқиқоти Осиёи Марказӣ (ш.Самарқанд) ва коршиносони маҳаллӣ ҷалб шудаанд.

АКС: Вазорати корҳои хориҷии Ҷумҳурии Тоҷикистон