ДАРАХТ БИНШОН! Дар мавзеъҳои Парваришгоҳи ноҳияи Сангвор 1800 бех ниҳолҳои дарахтони мева ва ҳамешасабз шинонида шуданд

САНГВОР, 20.12.2023 /АМИТ «Ховар»/. Дар мавзеъҳои Парваришгоҳи  ноҳияи Сангвор ва минтақаҳои ҷангалпарварии Чилдара 4 гектар ҷангал бунёд шуд, ки дар он 1800 бех дарахтони себи кӯҳӣ, хуч, ақоқиё, чормағз ва дарахтони ҳамешасабз шинонида шуданд. Дар ин хусус директори Муассисаи давлатии хоҷагии ҷангали ноҳияи Сангвор Раҳмиддин Аҳмад ба мухбири минтақавии АМИТ «Ховар» Субҳониддини Маҳмуд иттилоъ дод.

Ҳамчунин дар маъракаи тирамоҳии ниҳолшинонӣ дар ҳудуди ҷамоатҳои деҳоти Заршӯён ва Вахёи ноҳияи Сангвор тариқи ҳашари умумӣ  зиёда аз 1000 бех ниҳолҳои олуча, зардолу, олу, ақоқиё ва чормағз шинонида шуданд.

Тибқи иттилои мутахассисони ҷангал, ҳадаф аз шинонидани дарахтони себи кӯҳӣ, чормағз ва дигар навъҳои дарахтони мевадиҳанда дар ҷангалзори ноҳияи Сангвор таъмини ҳайвонҳои нодири ин минтақа бо хӯрокворӣ ва ҷамъоварии ҳосили фаровон мебошад, ки ин бойигарии ҷангал ба ҳисоб меравад. Аз ин рӯ дар ниҳолхонаи Хоҷагии ҷангали ноҳияи Сангвор зиёда аз 6000 бех ниҳолҳои гуногун парвариш меёбанд, ки дар оянда ба бунёди ҷангалзори ноҳия мусоидат менамоянд.

Тибқи иттилои масъулини шуъбаи ҳифзи муҳити зисти ноҳияи Сангвор, ба хотири гузаронидани маъракаи ноҳиявии сабзазоркунӣ ва ободонӣ дар солҳои 2023-2024 дар ҳудуди ҷамоатҳои деҳоти ноҳия 5930 бех дарахтони мевадиҳандаву ороишӣ, ҳамешасабз ва гулу буттаҳо шинонида мешаванд.

Мардуми  заҳматпешаву ободгари ноҳияи Сангвор ният доранд, ки бо шинонидани ниҳолҳои ороишиву ҳамешасабз, гулу буттаҳо ва тоза намудани атрофи корхонаву муассисаҳо ва хонаҳои истиқоматӣ дар ободии диёр саҳм гузоранд. Зеро сокинони  ноҳияи Сангвор чун дигар мардуми Тоҷикистон ба хубӣ дарк намудаанд, ки ободии Ватан аз ободии маҳал ва ҳар хонаи он сарчашма мегирад.

   АКС: Муассисаи давлатии хоҷагии ҷангали ноҳияи Сангвор