«Амонатбонк», «Ориёнбонк» ва «Бонки Эсхата» бонкҳои низомсоз эътироф гардиданд

ДУШАНБЕ, 24.01.2024 /АМИТ «Ховар»/. Бонки миллии Тоҷикистон рӯйхати ташкилоти қарзии низомсоз ва ташкилоти қарзии эҳтимолиро тасдиқ намуд, хабар медиҳад АМИТ «Ховар» бо истинод ба Бонки миллии Тоҷикистон.

Корхонаи воҳиди давлатии «Бонки амонатгузории Ҷумҳурии Тоҷикистон «Амонатбонк» бо меъёри  ҷамъбасти 22,87 дар зинаи аввал қарор дорад. Ҷамъияти саҳомии кушодаи /ҶСК/ «Ориёнбонк» бо меъёри ҷамъбасти 18,63 ва ҶСК «Бонки Эсхата» бо меъёри ҷамъбасти 14,76 дар зинаҳои дуюм ва сеюми рӯйхати ташкилоти қарзии низомсоз қарор гирифтаанд.

Ҳамзамон Ҷамъияти саҳомии пӯшидаи «Бонки байналмилалии Тоҷикистон»  бо меъёри ҷамъбасти 6,01 тибқи қарори  Раёсати Бонки миллии Тоҷикистон дар рӯйхати ташкилоти қарзии эҳтимолӣ мавқеъ гирифтааст.

Бояд тазаккур дод, ки ин рӯйхат соле як маротиба бо назардошти доираи фарогирии шабакаҳо, иқтидор, мавқеъ ва нишондиҳандаҳои молиявӣ таҳия гардида, дар сомонаи Бонки миллии Тоҷикистон ва маҷаллаи «Бонкдорӣ. Тараққиёт. Ҷаҳонишавӣ» нашр мегардад.

АКС: Бонки миллии Тоҷикистон