Дар шаҳри Турсунзода маъракаи шинонидани гулҳои гуногунранги лола оғоз гардид

ДУШАНБЕ, 03.01.2024 /АМИТ «Ховар»/. Дар Боғи фарҳангӣ-фароғатии шаҳри Турсунзода  шинонидани гулҳои гуногунранги лола оғоз гардид, ки ин амал бо мақсади иштироки фаъолона дар озмуну фестивалҳои дарпешистода, бахусус Фестивали «Сайри гули лола» амалӣ мешавад, хабар медиҳад АМИТ «Ховар» бо истинод ба мақомоти иҷроияи ҳокимияти давлатии шаҳр.

Фестивали «Сайри гули лола» ҳамасола дар мамлакат таҷлил гардида, ҳадаф аз баргузории ин озмун, пеш аз ҳама, баланд бардоштани сатҳи донишу маърифат, фарҳангу ҷаҳонбинӣ, бедор намудани завқи зебоипарастӣ дар зеҳни ҳар сокини мамлакат, ободу зебо намудани ҳар хона, кӯча, маҳалла, деҳа, деҳот, шаҳрак, ноҳия, шаҳр, вилоят ва ҷумҳурӣ буда, он ба ҷашни 35-солагии Истиқлоли давлатии Ҷумҳурии Тоҷикистон бахшида шудааст.

Баргузории озмун дар эҳёи анъанаҳои ниёгон, ободонӣ ва хуррамии муҳити атроф, бедор намудани муҳаббати сокинони мамлакат ба гулпарварӣ, ҳифзи мероси табиӣ ва дар ин замина ҷалби сайёҳону рушди соҳаи сайёҳӣ дар Ҷумҳурии Тоҷикистон мусоидат менамояд.

Гули лола ва Фестивали ҷумҳуриявии «Сайри гули лола» рамзи Ватани наврӯзии тоҷикон буда, рукни таърихии ҷашни Наврӯзи оламафрӯз аст. Эҳёи ин суннат аз дӯст доштани табиат ва зебоипарастии мардуми тоҷик сарчашма мегирад.

АКС: Мақомоти иҷроияи ҳокимияти давлатии шаҳри Турсунзода