«Мактаби сарварии сиёсии Пешвои миллат Эмомалӣ Раҳмон ва дурнамои рушди он». Таҳти ин унвон китоб чоп шуд

ДУШАНБЕ, 27.01.2024 /АМИТ «Ховар»/. «Мактаби сарварии сиёсии Пешвои миллат Эмомалӣ Раҳмон ва дурнамои рушди он»- таҳти ин унвон дар нашриёти «Нури маърифат»-и Донишгоҳи давлатии Хуҷанд ба номи академик Бобоҷон Ғафуров монографияи муҳаққиқ, сиёсатшинос, муовини ректор оид ба илм ва инноватсияи Донишгоҳи давлатии Хуҷанд Диловар Саидзода ба нашр расид. Дар ин хусус ба АМИТ «Ховар» дар Донишгоҳи давлатии Хуҷанд хабар доданд. 

Дар асари мавриди назар хусусияти ташаккули сарварии сиёсӣ дар шароити Тоҷикистон мавриди таҳқиқу баррасии густарда қарор гирифтааст. Дар навбати аввал заминаҳои таърихию сиёсӣ ва назариявию методологии ташаккули сарварии сиёсӣ таҳлилу баррасӣ гардида, хусусияти муҳимми рушди ниҳоди сарварӣ дар Тоҷикистони соҳибистиқлол таҳқиқ гардидааст.

Ҳамчунин дар китоб раванди ташаккули мактаби сарварии Президенти Ҷумҳурии Тоҷикистон муҳтарам Эмомалӣ Раҳмон мавриди омӯзиш қарор дода шудааст. Натиҷаҳои таҳқиқот барои ташаккули ниҳоди сарварӣ ва мактаби сарварии сиёсӣ аҳамияти илмию назариявӣ дошта, ба рушди Мактаби сиёсии Пешвои миллат заминаи илмӣ гузошта метавонанд.

Китоби «Мактаби сарварии сиёсии Пешвои миллат Эмомалӣ Раҳмон ва дурнамои рушди он» аз пешгуфтор, ду боб, панҷ фасл ва хулосаву феҳристи адабиёт иборат буда, ба муаррихон, ҷомеашиносон, сиёсатмадорон ва доираи васеи хонандагон пешниҳод мегардад.

АКС: Донишгоҳи давлатии Хуҷанд ба номи академик Бобоҷон Ғафуров