Дар Озарбойҷон пеш аз баргузории интихоботи президентӣ рӯзи хомӯшӣ эълон гардидааст

ДУШАНБЕ, 06.02.2024 /АМИТ «Ховар»/. Дар Озарбойҷон, ки  пагоҳ, 7 феврал интихоботи пеш аз муҳлати президентӣ баргузор мегардад, рӯзи хомӯшӣ эълон гардидааст. Дар ин рӯз тарғиб,  гузаронидани ҳама гуна чорабиниҳо ва вохӯриҳои номзадҳо бо интихобкунандагон манъ аст. Дар ин хусус АМИТ «Ховар» бо истинод ба агентии иттилоотии ТАСС хабар медиҳад.

Рӯзи душанбе акси ҳафт нафар номзадҳоро  ба мансаби  президентӣ  дар  сутунпояҳои махсуси   хиёбонҳо дидан мумкин буд, аммо рӯзи сешанбе то соатии 08:00 ба вақти маҳаллӣ — расо 24 соат пеш аз оғози овоздиҳӣ онҳо  бардошта шуданд. Танҳо овезаҳое боқӣ монданд, ки  аз наздик шудани рўзи интихобот дарак дода,  сокинонро ба  иҷрои вазифаи  шаҳрвандӣ, яъне иштироки фаъолона дар ин маъракаи муҳими сиёсӣ даъват менамоянд. Дар баъзеи онҳо шаҳрвандон метавонанд дар бораи чӣ гуна пайдо кардани участкаи интихоботӣ ё дуруст пур кардани бюллетен  маълумот пайдо кунанд.

            Рӯзи интихобот дар Озарбойҷон рӯзи истироҳат эълон шуда, 6 феврал рӯзи корӣ маҳсуб мешавад. Ҳатто дар мактабҳое, ки дар онҳо қитъаҳои интихоботӣ кушода шудаанд, ҳоло дарсҳо идома доранд. Бо вуҷуди ин тамоми шароит барои оғози овоздиҳӣ фароҳам оварда шудааст: кабинаҳо ва қуттиҳои шаффофи интихобот насб гардида, варақаҳои овоздиҳӣ дар сандуқҳои муҳрзада ҷойгир кунонида шудаанд.

Президенти Озарбойҷон ба муҳлати 7 сол интихоб мешавад. Маҳдудият дар муҳлат дар назар дошта нашудааст. Интихоботи президентии қаблӣ дар Озарбойҷон 11 апрели соли 2018 баргузор гардида буд.

АКС аз манбаъҳои боз