Соли гузашта дар ноҳияи Ашт зиёда аз 255 километр роҳро таъмир намуданд

СУҒД, 06.02.2024 /АМИТ «Ховар»/. Соли 2023 бо ташаббуси Мақомоти иҷроияи ҳокимияти давлатии ноҳияи Ашт ва дастгирии соҳибкорону сокинони ноҳия роҳи мошингарди «Ашт — Хуҷанд» то гардиши шаҳри Гулистон дар масофаи 98 километр ба маблағи 2 миллиону 72 ҳазор сомонӣ бо асфалти гарм таъмири ҷорӣ шуд. Дар ин хусус Раиси ноҳияи Ашт Шӯҳрат Муҳаммадзода  зимни нишасти матбуотӣ ба хабарнигорон маълумот дод.  

Раиси ноҳия бо изҳори қаноатмандӣ аз иҷрои ҳамаи нишондиҳандаҳои нақшавии рушди иқтисодиву иҷтимоии ноҳия иброз дошт, ки давоми соли 2023 дар ноҳия 255,5 километр роҳ аз таъмири хушсифат бароварда шуд, дар масофаи 32 километр таъмири асосӣ, дар 181 километр таъмири ҷорӣ ва дар 42,5 километр роҳ шағалпӯш гардид.

Тазаккур дода шуд, ки барои иҷрои корҳо зиёда аз 12 миллиону 340 ҳазор сомонӣ, аз ҷумла беш аз 360 ҳазор сомонӣ аз буҷети Вазорати нақлиёти Ҷумҳурии Тоҷикистон, 30 ҳазор сомонӣ аз буҷети маҳаллӣ ва аз ҳисоби соҳибкорону аҳолӣ зиёда аз 11 миллиону 950 ҳазор сомонӣ маблағ сарф гардидааст.

Саъдулло МАҲКАМ,
АМИТ «Ховар»

АКС: Хадамоти матбуоти Раиси ноҳияи Ашт