ҲУКУМАТИ ЭЛЕКТРОНӢ. Бо мақсади гузариш ба таҳсили рақамӣ дар Душанбе китобхонаи электронӣ ташкил гардид

Февраль 21, 2024 08:59

ДУШАНБЕ, 21.02.2024. /АМИТ «Ховар»/. Дар доираи ташаббусҳо ҷиҳати гузариш ба таҳсили рақамӣ ва амалӣ намудани Консепсияи ташаккули ҳукумати электронӣ дар Ҷумҳурии Тоҷикистон аз ҷониби Муассисаи давлатии «Маркази таҳлилӣ-иттилоотии назди Сарраёсати маорифи шаҳри Душанбе» барои муассисаҳои таҳсилоти миёнаи умумӣ китобхонаи электронӣ ташкил шуд. Дар ин хусус ба АМИТ «Ховар» директори Муассисаи давлатии «Маркази таҳлилӣ-иттилоотии назди Сарраёсати маорифи шаҳри Душанбе» Зафар Муродзода хабар дод.

Китобхона фарогири беш аз 5000 номгӯй адабиёти таълимиву методӣ, илмиву оммавӣ, бадеиву маърифатӣ ва санадҳои меъёрҳои ҳуқуқӣ бо забонҳои тоҷикӣ, русӣ ва англисӣ буда, ҳаҷми умумии он ба 10 гигабайт мерасад.

«Таъсиси китобхонаҳои электронӣ дар заминаи муассисаҳои таълимӣ аз ҷумлаи талаботи замони муосир ба шумор меравад. Зеро китобхонаи электронӣ шакли муосири дастёбӣ ба захираҳои маънавӣ буда, тавассути технологияҳои иттилоотӣ амалӣ мешавад. Корбарон ба воситаи манбаъҳои электронии иттилоотӣ, бахусус тавассути китобхонаи электронӣ имкон меёбанд, ки ба маълумоти мавриди назарашон осон ва зуд дастрасӣ пайдо намоянд. Зуҳури китобхонаҳои электронӣ ва сомонаҳои интернетии маърифатӣ аз ҷумлаи падидаҳои неки асри технология буда, ҳар кадом махсусияти худро дорад», -гуфт директори муассиса.

Китобхонаи электроние, ки аз ҷониби Маркази таҳлилӣ-иттилоотии назди Сарраёсати маорифи шаҳри Душанбе таҳия гардид, аз хусусияти хоссаи китобхонаҳои электронии муосир бархӯрдор аст. Дар баробари ин, интерфейси китобхона дар тарҳи муосир таҳия шуда, мураттабии мантиқии бахшҳои он таъмин гардидааст.

Ба гуфтаи Зафар Муродзода, яке аз вижагиҳои муҳимми китобхона дар он зоҳир мешавад, ки корбарон аз имконоти он тавассути компютерҳои ин ё он муассиса истифода бурда метавонанд. Китобхона дар марҳилаи аввал ба сурати офлайн амал намуда, дар базаи маълумоти синфхонаҳои компютерии муассисаҳои таълимӣ насб мешавад. Корбарон ба воситаҳои ҳамаи компютерҳои синфхона имконияти истифода аз китобхонаро пайдо менамоянд.

Хусусияти дигари барнома иловаи бахши «Адабиёти тавсиявии озмунҳои ҷумҳуриявӣ» аст. Дар ин бахш адабиёти тавсиявие, ки дар низомномаи озмунҳои ҷумҳуриявии «Фурӯғи субҳи доноӣ китоб аст» ва «Илм — фурӯғи маърифат» дарҷ ёфтаанд, аз рӯи номинатсия ва зергурӯҳҳои он илова шуданд. Инчунин саҳифаи асосии барнома барои хонандагон ба таври худкор (автоматӣ) китобҳоеро барои мутолиа тавсия медиҳад.

Муҳити саҳифаи асосии китобхона бо шиору овезаҳои мухталиф оро дода шуда, барои хонандагон суханони ҳикматомӯзи Пешвои миллат ва мутафаккирону донишмандонро доир ба китобу китобхонӣ пешниҳод менамояд.

Дар китобхонаи электронӣ адабиёт вобаста ба мавзуъ бахшбандӣ гардидааст. Аз ин хотир дар саҳифаи асосии барнома бахши умда ҷой дода шуд, ки аз «Пешвои миллат», «Китобҳои дарсӣ», «Адабиёти бадеӣ», «Маводи таълимӣ», «Илмҳои табиӣ-риёзӣ», «Илмҳои ҷамъиятӣ-гуманитарӣ», «Китобҳо бо забони хориҷӣ» ва «Санадҳои меъёрӣ-ҳуқуқӣ»  иборат мебошанд.

Ҳадаф аз амалӣ намудани барнома муҳайё сохтани шароити мусоид барои омӯзгорону хонандагони муассисаҳои таҳсилоти миёнаи умумӣ барои дастрасӣ ба адабиёти гуногуни таълимиву бадеӣ ва илмӣ мебошад.

Китобхонаи электронӣ дар асоси Қарори Ҳукумати Ҷумҳурии Тоҷикистон аз 30 декабри соли 2011 «Дар бораи Консепсияи ташаккули ҳукумати электронӣ дар Ҷумҳурии Тоҷикистон» ва Қарори Ҳукумати Ҷумҳурии Тоҷикистон аз 31 августи соли 2022 «Дар бораи Консепсияи гузариш ба таҳсилоти рақамӣ барои давраи то соли 2042» таҳия гардидааст.

Ин сомона дорои махзани бузурги китобҳои электронӣ буда, аз ҷониби мутахассисони Маркази таҳлилӣ-иттилоотӣ мунтазам ташаккул дода мешавад. Дар версияҳои такмилии китобхонаи электронӣ маҷаллаву рӯзномаҳои соҳавӣ ва маҷаллаҳои институту пажуҳишгоҳҳои илмӣ-таҳқиқотии мамлакат илова мешаванд. Инчунин кушодани сомонаи китобхонаи электронӣ ва ворид намудани китобҳои савтӣ ба назар гирифта шудааст.

Ёдовар мешавем, ки дар Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» вобаста ба рақамикунонии соҳаи маориф дастуру супориш дода шуда,  таъкид шуд, ки хонандагону омӯзгорон ба истифодаи технологияҳои иттилоотӣ ҷалб шаванд.

Зарангези ЛАТИФ,
АМИТ «Ховар»

АКС: Маркази таҳлилӣ-иттилоотии назди Сарраёсати маорифи шаҳри Душанбе

Февраль 21, 2024 08:59

Хабарҳои дигари ин бахш

Дар Тоҷикистон Фестивал- намоишгоҳи якуми байналмилалии муассисаҳои таҳсилоти олии касбии давлатҳои хориҷӣ баргузор мегардад
Доир ба нақш ва ҷойгоҳи муҳаққиқони ватанӣ дар рушди илми ҳуқуқшиносӣ конференсияи ҷумҳуриявӣ баргузор шуд
Масъалаи эътирофи баробарарзиши дипломҳои муассисаҳои таҳсилоти олӣ ва дараҷаву унвонҳои илмӣ байни Тоҷикистон ва Чин баррасӣ шуд
Дар ноҳияи Ҷалолиддини Балхӣ бинои иловагии муассисаи таълимӣ барои 288 хонанда ифтитоҳ ёфт
АМИТ «Ховар»: Намоишгоҳи маҳсулоти саноатии Ҷумҳурии Узбекистон дар Маркази ЭКСПО-и шаҳри Душанбе 3 рӯз идома меёбад
Донишгоҳи байналмилалии забонҳои хориҷии Тоҷикистон ва Донишгоҳи давлатии омӯзгории Бошқирдистон шартномаи ҳамкорӣ ба имзо расониданд
ФАРЗАНДОНРО БА РОҲИ РОСТ ҲИДОЯТ НАМОЕМ! Имрӯз барои илму дониш омӯхтан ва соҳибкасб гардидани онҳо тамоми шароит муҳайё гардидааст
МАРОТИБАИ АВВАЛ. Байни тарбиягирандагони муассисаҳои таҳсилоти томактабии Душанбе озмуни забондонӣ идома дорад
Байни Донишгоҳи давлатии омӯзгории Тоҷикистон ва 7 донишгоҳи олии Узбекистон шартномаи ҳамкорӣ ба имзо расид
Дар Донишгоҳи давлатии ҳуқуқ, бизнес ва сиёсати Тоҷикистон ҳамоиши рушди робототехника доир шуд
БО КВОТАИ «ДУРАХШАНДАГОН»-МАШҲУР ДАР ҶАҲОН. Донишҷӯёни тоҷик бо таҳсили намунавӣ дар рейтинги аввал қарор доранд
Ҳамкории дуҷонибаи Тоҷикистон ва Узбекистон дар самти таҳсили олии касбӣ ва илм баррасӣ карда шуд