35-СОЛАГИИ ИСТИҚЛОЛИ ДАВЛАТӢ. Дар Роштқалъа мактаб, боғи фарҳангию фароғатӣ ва кӯдакистон сохта мешаванд

ДУШАНБЕ, 04.03.2024 /АМИТ «Ховар»/. Бо мақсади шиносоӣ бо ҷараёни корҳои сохтмонӣ Раиси Вилояти Мухтори Кӯҳистони Бадахшон Алишер Мирзонабот дар ноҳияи Роштқалъа бо фаъолияти корхонаи дӯзандагии «Гулдаста» шинос гардид. Дар ин хусус АМИТ «Ховар» бо истинод ба мақомоти иҷроияи ҳокимияти давлатии вилоят хабар медиҳад.

Ин корхона соли 2018 барои 100 дӯзанда ба истифода дода шудааст. Зимни шиносоӣ ба роҳбарияти ноҳия ва масъулини корхона барои бо иқтидори пурра ба кор андохтани он, таъмини муассисаҳои таҳсилоти ҳамагонӣ ва тандурустии ноҳия бо либоси мактабӣ ва тиббӣ, инчунин ҷалби занони хонанишин ба кор дастурҳои мушаххас дода шуд.

Раиси вилоят ҳамзамон бо якчанд иншооте, ки бахшида ба 35-солагии Истиқлоли давлатии Ҷумҳурии Тоҷикистон сохта мешаванд, аз ҷумла Муассисаи таҳсилоти миёнаи умумии рақами 24 барои 640 хонанда, мавзеъҳои бунёди боғи фарҳангию фароғатӣ ва кӯдакистон барои 200 кӯдак шинос гардид.

АКС: Мақомоти иҷроияи ҳокимияти давлатии Вилояти Мухтори Кӯҳистони Бадахшон