Дар Донишгоҳи давлатии ҳуқуқ, бизнес ва сиёсати Тоҷикистон оид ба ҳифзи Ватан ва мубориза бо падидаҳои номатлуб мулоқот доир шуд

ДУШАНБЕ, 20.03.2024 /АМИТ «Ховар»/.  Дар Донишгоҳи давлатии ҳуқуқ, бизнес ва сиёсати Тоҷикистон мулоқоти судманд баргузор гардид. Дар ин хусус АМИТ «Ховар» бо истинод ба ин донишгоҳ хабар медиҳад.

Ректори Донишгоҳ Ҳомид Ҳошимзода доир ба дастовардҳои замони соҳибистиқлолӣ, арҷгузорӣ ба муқаддасоти миллӣ, эҳтироми анъанаҳои таърихиву фарҳангӣ ва мубориза ба падидаҳои номатлубу зиёдаравӣ сухан гуфт.

Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Зулфиқор Гулаҳмадзода  аз мулоқоти Пешвои миллат муҳтарам Эмомалӣ Раҳмон бо аҳли зиёву ходимони дини мамлакат ёдоварӣ намуда, доир ба татбиқи қонунҳои Ҷумҳурии Тоҷикистон «Дар бораи ватандӯстӣ», «Дар бораи ҷавонон ва сиёсати давлатии ҷавонон», «Дар бораи танзими анъана ва ҷашну маросими миллӣ дар Тоҷикистон» ва «Дар бораи масъулияти падару модар дар таълиму тарбияи фарзанд» сухан гуфт.

Таъкид шуд, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ин мулоқот чунин гуфтанд: «Пеш аз ҳама, бояд сари ин проблема андеша намоем, ки дар давраҳои хеле ҳассоси тезутунд шудани муносибатҳои байни абарқудратҳо барои ҷорӣ намудани низоми нави ҷаҳондорӣ, сарфи назар аз мавҷудияти ақидаҳои мухталифи сиёсиву динӣ ва иҷтимоӣ дар ҷомеа мо барои ҳифзи сарвати бузургтарин ва бобақои худ, яъне Ватан ва Истиқлолияти миллӣ муттаҳид бошем, барои ҳифзи манфиатҳои милливу давлатии худ зиракиро аз даст надиҳем».

Дар ҳақиқат, ҷаҳонишавӣ ва зуҳури гурӯҳҳои манфиатҷӯву афзоиши хатарҳои экстремистиву террористӣ ба оромиву субот ва истиқлолу соҳибихтиёрии кишарҳои ҷудогонаи олам таҳдид менамояд, ҳар сокини сайёра ва миллату давлатҳоро ҳушдор медиҳад, ки аз ин қабил падидаҳои хатарзо дар амон бошад. Коршиносони ватанию байналмилалӣ борҳо омили асосии пайваст шудани ҷавонону сокинонро ба гурӯҳҳои ифротӣ ба маърифати пасти ҳуқуқӣ, донишҳои диниву сиёсии онҳо марбут донистаанд.

Дар интиҳо ҷавонон даъват шуданд, ки пайваста омӯзанд ва бо падидаҳои номатлуб мубориза бурда, дар ҳифзу гиромидошти дастовард ва муқаддасоти Тоҷикистони соҳибистиқлол саҳм гузоранд.

 АКС: Донишгоҳи давлатии ҳуқуқ, бизнес ва сиёсати Тоҷикистон