Дар Хатлон масъалаи таъсиси Маркази омӯзиши технологияи нав аз ҷониби Корея баррасӣ гардид

ДУШАНБЕ, 15.03.2024. /АМИТ «Ховар»/. Раиси вилояти Хатлон Давлаталӣ Саид бо раиси Ҷамъияти дӯстии Ҷумҳурии Корея бо давлатҳои Осиёи Марказӣ Ли Ок Рён вохӯрӣ намуд, ки зимни он ҷонибҳо масъалаи таъсиси Маркази омӯзиши технологияи навро мавриди муҳокима қарор доданд, хабар медиҳад АМИТ «Ховар» бо истинод ба шуъбаи иттилоотию таҳлилии дастгоҳи Раиси вилояти Хатлон.

Дар ҷараёни мулоқот масъалаҳои тарғиби ҳамкории дуҷониба ва табодули таҷриба дар самти кишоварзӣ, сайёҳӣ ва дигар масъалаҳои мубрам баррасӣ гардид.

Таъкид гардид, ки Хатлон  яке аз калонтарин вилояти Ҷумҳурии Тоҷикистон ба шумор рафта, 52 фоизи маҳсулоти кишоварзии ҷумҳуриро ташкил медиҳад. Ҳамасола дар ҳудуди вилоят то 300 ҳазор тонна пахта ва 2,5 миллион тонна меваву сабзавот истеҳсол мешавад.

Зимни вохӯрӣ ҷонибҳо оид ба ҳамкорӣ дар соҳаи маориф ва бо дастгирии Сафорати Корея дар Донишгоҳи давлатии Бохтар ба номи Носири Хусрав кушодани Маркази забони кореягӣ машварат намуданд.

Ли Ок Рён даъват гардид, ки дар Форуми «Бохтар Фуд», ки моҳи майи имсол баргузор мегардад, иштирок намояд.

АКС: Шуъбаи иттилоотию таҳлилии дастгоҳи раиси вилояти Хатлон