ПЕШОМАДҲОИ РУШДИ УСТУВОРИ ПАХТАКОРӢ ДАР ТОҶИКИСТОН». Доир ба он дар Душанбе конференсияи байналмилалӣ оғоз ёфт

Март 4, 2024 15:35

ДУШАНБЕ, 04.03.2024. /АМИТ «Ховар»/. Имрӯз дар шаҳри Душанбе бо мақсади баррасии Стратегияи рушди пахтакории устувор ва дастгирии занҷираҳои истеҳсоли маҳсулоти аз ҷиҳати экологӣ тоза таҳти унвони «Пешомадҳои рушди устувори пахтакорӣ дар Тоҷикистон: татбиқи занҷираи истеҳсолӣ» конференсияи байналмилалӣ оғоз гардид, иттилоъ медиҳад АМИТ «Ховар».

Конференсия бо ташаббуси Вазорати кишоварзии Ҷумҳурии Тоҷикистон доир шуда,ҳадаф аз баргузории он  баррасии масъалаҳои мухталифи марбут ба рушди пахтакорӣ ва таҳияи самтҳои асосии Стратегияи рушди устувори пахтакорӣ дар Тоҷикистон мебошад.

Зимни ифтитоҳи ҳамоиш Вазири кишоварзии Ҷумҳурии Тоҷикистон Қурбон Ҳакимзода иброз дошт, ки пахтакорӣ яке аз бахшҳои муҳими иқтисодиёти мамлакат маҳсуб шуда, соли 2023 қариб 5 фоизи маҷмуи маҳсулоти кишоварзиро ташкил дод.

Иттилоъ дода шуд, ки соли 2023 дар хоҷагиҳои пахтакори ҷумҳурӣ дар майдони зиёда аз 175 ҳазор гектар кишти пахта гузаронида шуда, беш аз 400 ҳазор тонна пахта ҷамъоварӣ шудааст.

Таъкид шуд, ки бо зиёд гардидани аҳолӣ дар ҷаҳон, тағйирёбии иқлим, баланд шудани ҳарорат ва хушксолии дарозмуддат яке аз самтҳои муҳими гузариш ба саноатикунонии босуръати мамлакат- ин рушди пахтакории устувор мебошад.

Пахтакории устувор усулҳо ва амалияҳоеро дар бар мегирад, ки ба коҳиш додани таъсири манфӣ ба муҳити атроф ва баланд бардоштани устуворӣ ба тағйирёбии иқлим равона шудаанд. Ба чунин усулҳо истифодаи самараноки обёрӣ, ғизодиҳӣ, такмили селексия ва тухмипарварӣ, истифода бурдани навъҳои баландсифати ба гармӣ ва касаливу ҳашароти зараррасон тобовар дохил мешаванд. Аз ин рӯ Тоҷикистон ба ҷорӣ намудани якчанд стандарти устувори байналмилалӣ шуруъ намудааст, ки яке аз онҳо стандарти Better Cotton  мебошад.

Better Cotton — ин ташкилоти калонтарини дунё дар самти рушди стандарти пахтаи устувор мебошад. Ин стандарт дар умум ба беҳтар гардонидани истеҳсоли пахта равона гардидааст.

Ёдрас мешавем, ки Тоҷикистон соли 2013 дар байни давлатҳои Осиёи Марказӣ аввалин шуда, стандартҳои устуворро дар соҳаи пахтакорӣ тавассути татбиқи лоиҳаҳои озмоишӣ ҷорӣ намуд.

Дастгирӣ ва рушди истеҳсоли устувори пахта бо ҳадафу вазифаҳои Консепсияи таъсис ва рушди кластерҳои агросаноатӣ дар Тоҷикистон барои давраи то соли 2040, ки аз ҷониби Ҳукумати Тоҷикистон қабул шудааст, мувофиқат менамояд. Ин консепсия ба рушди кластерҳои инноватсионии агросаноатӣ ҳамчун фишангҳои таҳкими рақобатпазирии истеҳсолкунандагони тоҷик равона шудааст.

Конференсияи байналмилалии «Пешомадҳои рушди устувори пахтакорӣ дар Тоҷикистон: татбиқи занҷираи истеҳсолӣ» ду рӯз идома ёфта, дар он мушкилот ва дурнамои соҳа муҳокима ва стратегияи рушди минбаъда муайян мешавад.

Зарангези ЛАТИФ,
АМИТ «
Ховар»

АКС: АМИТ «Ховар»

Март 4, 2024 15:35

Хабарҳои дигари ин бахш

Дар 173 ҳазору 835 гектар майдони корхонаҳои кишоварзӣ ва хоҷагиҳои деҳқонии Суғд кишти баҳорӣ гузаронида мешавад
Соли 2024 дар Тоҷикистон 5 лоиҳа дар соҳаи роҳу нақлиёт татбиқ карда мешавад
Тоҷикистон ва Хазинаи Авруосиёии субот ва рушд лоиҳаи тавсеаи буҷети барномавиро оғоз менамоянд
Ширкатҳои Ҳиндустон ба истеҳсоли молу маҳсулоти саноатӣ дар Тоҷикистон изҳори ҳавасмандӣ намуданд
Имрӯз дар Бангкок ҷаласаи вазирони Барномаи махсуси СММ барои иқтисодиёти Осиёи Марказӣ доир шуд
Тоҷикистон ва Узбекистон гузариши транзитии мошинҳои боркашро осон менамоянд
Дар корхонаи «Роҳи оҳани Тоҷикистон» 130 вагон аз таъмири асосӣ ва умумӣ бароварда шуд
Дар Тоҷикистон беш аз 1,6 миллион тонна бор ва 95,8 ҳазор мусофир интиқол дода шуд
Дар мулоқоти ҳайати Тоҷикистон бо директори Бонки ҷаҳонӣ оид ба масъалаҳои бахши амалиётӣ маблағгузорӣ ба сохтмони неругоҳи «Роғун» баррасӣ гардид
Дар Тоҷикистон иҷрои нақшаи андозҳо ва дигар пардохтҳои ҳатмӣ ба андозаи 105,9% таъмин гардид
Ҳайати Тоҷикистон дар маҷлиси машваратии давлатҳои электорати ҷаласаҳои баҳории Хазинаи Байналмилалии Асъор ва гурӯҳи Бонки ҷаҳонӣ иштирок намуд
Дар Вашингтон машварати мудирони Хазинаи Байналмилалии Асъор аз давлатҳои Шарқи Наздик ва Осиёи Марказӣ доир гардид