ТАҚВИМИ АМИТ «ХОВАР»: имрӯз 21 март, панҷшанбе, 81-умин рӯзи соли 2024 аст

21 марти соли 2011 дар шаҳри Душанбе ҷаласаи XIII Шурои роҳбарони агентиҳои давлатии иттилоотии Иттиҳоди Давлатҳои Мустақил баргузор гардид.

***

21 марти соли 2013  дар шаҳри Ашқободи Туркманистон Ҷашни байналмилалии Наврӯз бо иштироки Президенти Ҷумҳурии Тоҷикистон Эмомалӣ Раҳмон, сарони давлатҳои Афғонистон, Эрон, Покистон, намояндагони воломақоми Озарбойҷон, Туркия, Қазоқистон, Қирғизистон, Тотористони Русия, муовини дабири кулли Созмони Милали Муттаҳид, роҳбари шуъбаи ин созмон дар Женева Қосим Ҷомарт Токаев ва ҳайатҳои илмиву фарҳангӣ аз давлатҳо ва созмонҳои дигар баргузор гардид.

***

21 марти соли 2015 дар ноҳияи Ҷаббор Расулови вилояти Суғд маросими пардабардорӣ аз болои пайкараи Исмоили Сомонӣ баргузор шуд.

***

21 марти соли 2015 Президенти Ҷумҳурии Тоҷикистон муҳтарам Эмомалӣ Раҳмон дар шаҳри Хуҷанд ба 500 ятим аз шаҳру ноҳияҳои вилояти Суғд туҳфаҳои наврӯзӣ тақдим намуданд.

***

Дар ин рӯзи соли 2017  дар Қароргоҳи Созмони Милали Муттаҳид дар шаҳри Ню-Йорк байни  Вазири корҳои хориҷии Ҷумҳурии Тоҷикистон Сироҷидин Муҳриддин ва Дабири кулли СММ Антонио Гутерриш дар робита ба татбиқи Даҳсолаи байналмилалии амал «Об барои рушди устувор», 2018-2028, ки бо ибтикори мамлакати мо моҳи декабри соли 2016 дар Маҷмаи Умумии СММ қабул гардида буд, мубодилаи афкори судманд доир шуд.

***

21 марти соли 2021 шаҳри Душанбе пойтахти фарҳангии Иттиҳоди Давлатҳои Мустақил эълон гардид. 

***

21 марти соли 2022 Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳраки Балхи ноҳияи Ҷалолиддини Балхӣ гулгашт, муҷассама ва мақбараи яке аз бузургтарин суханварони Машриқзамин — Мавлоно Ҷалолиддини Балхиро мавриди истифода қарор доданд. 

***

20 марти соли 2022  бахшида ба ҷашни байналмилалии Наврӯз дар шаҳри Душанбе Форуми III  байналмилалии «Наврӯзи Душанбе-меҳвари  робитаҳои фарҳангию сайёҳӣ» баргузор гардид.

***

21 марти соли 2023  Президенти Ҷумҳурии Тоҷикистон муҳтарам Эмомалӣ Раҳмон дар маросими ифтитоҳи Намоишгоҳи «Таърихи рушди Тоҷикистон», ки дар ҳошияи Конфронси оби СММ-2023 дар қароргоҳи Созмони Милали Муттаҳид дар шаҳри Ню-Йорк баргузор шуд, иштирок ва суханронӣ намуданд.

***

21 марти соли 2023 таҳти унвони «Наврӯзи Душанбе-2023» дар пойтахт фестивали байналмилалӣ баргузор шуд.

21 МАРТ:

Рӯзи байналмилалии Наврӯз.

***

Рӯзи байналмилалии Замин.

***

Рӯзи байналмилалии назм.

***

Рӯзи байналмилалии ҷангал.

ДАР ИН РӮЗ ТАВАЛЛУД ШУДААНД:

Фазлиддин Шаҳобов- соли 1911- мусиқишинос, сарояндаи мақом, навозандаи беназири танбӯр, сарояндаи шашмақом ва оҳангсози тоҷик.  Ҳунарпешаи шоистаи Тоҷикистон, дорандаи Ҷоизаи давлатии Тоҷикистон ба номи Абуабдуллоҳи Рӯдакӣ.