ТАРБИЯИ ВАТАНДӮСТИИ ШАҲРВАНДОН. Дар шаҳри Қазони Тотористон бо тоҷикони муқими ин кишвар ҳамоиш доир шуд

ДУШАНБЕ, 06.03.2024. /АМИТ «Ховар»/. Ҷиҳати татбиқи Қонуни Ҷумҳурии Тоҷикистон «Дар бораи тарбияи ватандӯстии шаҳрвандон»  бо ибтикори Ташкилоти ҷамъияти фарҳангии ҷавонони назди Кумитаи кор бо ҷавонон ва варзиши назди Ҳукумати Ҷуммҳурии Тоҷикистон, ки дар Ҷумҳурии Тотористон фаъолият дорад, дар якҷоягӣ бо Консулгарии генералии Ҷумҳурии Тоҷикистон дар шаҳри Уфа баҳри баланд бардоштани ҳисси ватандӯстиву хештаншиносии ҷавонони бурунмарзӣ ҳамоиш баргузор шуд. Дар ин хусус  ба АМИТ «Ховар» дар Кумитаи кор бо ҷавонон ва варзиш хабар доданд.

Хониши сиёсӣ таҳти унвони «Тарбияи ватандӯстии шаҳрвандон — омили таҳкими пояҳои давлатдории миллӣ» бо иштироки ҳайати ҷавонони зодаи Тоҷикистон, ки дар муассисаҳои олии шаҳри Қазони Ҷумҳурии Тотористон таҳсил доранд, доир гардид.

Зимни вохӯрӣ иштирокчиён доир ба моҳият ва мазмуни қонун сухан гуфта, таъкид намуданд, ки Ҷумҳурии Тоҷикистон, бахусус Кумитаи кор бо ҷавонон ва варзиши назди Ҳукумати Ҷумҳурии Тоҷикистон аз донишҷӯёне, ки дар хориҷи мамлакат таҳсил менамоянд, умеди калон дошта, мутахассисони баландихтисосро интизор ҳастанд, то дар оянда барои рушди давлат саҳм гузоранд.

Ҳамзамон таваҷҷуҳи ҳозирин ба ғамхорӣ ва дастгирии Президенти Ҷумҳурии Тоҷикистон-Пешвои миллат муҳтарам Эмомалӣ Раҳмон нисбат ба ҷавонон ва таълиму тарбияи насли наврас, бахусус шаҳрвандони Ҷумҳурии Тоҷикистон, ки дар хориҷи мамлакат таҳсил менамоянд, ҷалб гардид.

Донишҷӯён аз дастгирӣ ва ғамхории Роҳбари давлат ва ҳамкории пайвастаи намояндагии Кумитаи кор бо ҷавонон ва варзиши назди Ҳукумати Ҷуммҳурии Тоҷикистон изҳори миннатдорӣ намуда, иброз доштанд, ки  тамоми саъю талошашонро барои сазовор муаррифӣ намудани таъриху фарҳанги халқи тоҷик ва баланд бардоштани симои Ҷумҳурии Тоҷикистон дар давлати иқомат равона менамоянд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон