Олимпиадаи фанҳои ҷамъиятӣ-гуманитарӣ ва табиӣ-риёзӣ барои хонандагони синфҳои 9-10-и муассисаҳои таълимӣ оғоз гардид

ДУШАНБЕ, 05.04.2024. /АМИТ «Ховар»/. Имрӯз дар Муассисаи давлатии таълимии «Мактаби байналмилалии президентӣ» дар шаҳри Душанбе олимпиадаи фаннӣ аз фанҳои ҷамъиятӣ-гуманитарӣ ва табиӣ-риёзӣ барои хонандагони синфҳои 9-10-и муассисаҳои таълимии мамлакат оғоз гардид, иттилоъ доданд ба АМИТ «Ховар» дар маркази матбуоти Вазорати маориф ва илми Ҷумҳурии Тоҷикистон.

Дар олимпиада 1203 хонанда аз фанҳои ҷамъиятӣ — гуманитарӣ ва табиӣ-риёзӣ иштирок доранд.

Гуфта шуд, ки имрӯз соҳаи маориф зери таваҷҷуҳи Ҳукумати Ҷумҳурии Тоҷикистон қарор дошта, маблағгузорӣ ба соҳаи маориф сол то сол афзоиш меёбад. Дар ин росто барои амалӣ намудани сиёсати давлатии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон яке аз ҳадафҳое, ки Вазорати маориф ва илми Ҷумҳурии Тоҷикистон пеш гирифтааст, вусъати ҳаракати олимпӣ дар ҷумҳурӣ мебошад.

Намояндагони Маркази ҷумҳуриявии дарёфт ва рушди истеъдодҳо хонандагонро бо шартҳо ва тартиби баргузории олимпиада шинос намуданд. Хонандагон вобаста ба фанҳо ба гурӯҳҳо ҷудо шуда, давоми рӯз донишу маҳораташонро нишон медиҳанд.

Ёдовар мешавем, ки олимпиада то 7 апрел  идома меёбад.

АКС: Маркази матбуоти Вазорати маориф ва илми Ҷумҳурии Тоҷикистон