Имрӯз Намоишгоҳи байналмилалии универсалии «Тоҷикистон-2024» анҷом меёбад

ДУШАНБЕ, 05.05.2024. /АМИТ «Ховар»/. Имрӯз дар муҷтамаи «Манеж»-и шаҳри Душанбе Намоишгоҳи байналмилалии универсалии «Тоҷикистон-2024», ки дар он шуруъ аз 3 май молу маҳсулоти  65 ширкату корхонаҳои ватанӣ ва хориҷӣ ба намоиш гузошта шуд, анҷом меёбад, хабар медиҳад АМИТ «Ховар».

Намоишгоҳ аз ҷониби Палатаи савдо ва саноати Тоҷикистон бо дастгирии Ҳукумати Ҷумҳурии Тоҷикистон доир шуда, дар он ширкатҳои ватаниву хориҷӣ, аз ҷумла  Русия, Беларус, Узбекистон, Чин, Покистон ва  Туркия намунаи маҳсулоти мошинсозӣ, маводи кимиё, саноати сабук, нассоҷӣ, дорусозӣ, инчунин масолеҳи сохтмониро муаррифӣ намуданд.

Тавре масъулин иброз доштанд, мақсад аз баргузории намоишгоҳ- муаррифии молу маҳсулоти ватанӣ, ворид намудани технологияи нав, ҷалби сармоя ва таъсиси корхонаҳои муштарак мебошад.

Мақсади баргузории намоишгоҳ дар самтҳои мухталиф, аз ҷумла саноати сабук, кишоварзӣ, фармасевтика ва ороиши гигиенӣ, хӯрокворӣ, истеҳсоли масолеҳи сохтмонӣ, истеҳсоли чароғаки роҳнамо ва ғайра ба харидорону меҳмонон пешкаш намудани молу маҳсулот буд.

Бояд ёдовар шуд, ки Намоишгоҳи байналмилалии универсалии «Тоҷикистон-2024» аз соли  2016 инҷониб ба ширкатҳои ватанӣ барои намоиши дастовардҳои онҳо мусоидат ва ба ширкатҳои хориҷӣ барои дарёфти мавқеи онҳо дар бозори мамлакат кумак менамояд.

АКС: Палатаи савдо ва саноати Тоҷикистон