Шурои роҳбарони агентиҳои иттилоотии ИДМ барои мусоидат ба инъикоси Конфронси сеюми оби Душанбе қарор қабул намуд

Май 15, 2024 16:41

ДУШАНБЕ, 15.05.2024 /АМИТ «Ховар»/. Тавре АМИТ «Ховар» қаблан иттилоъ дод, 3 майи соли 2024 дар шаҳри Бокуи Ҷумҳурии Озарбойҷон ҷаласаи ХХХI Шурои роҳбарони агентиҳои давлатии иттилоотии Иттиҳоди Давлатҳои Мустақил баргузор гардид, ки дар кори он, аз ҷумла масъалаҳои вобаста ба инъикоси тағйирёбии иқлим ва масъалаҳои энергияи «сабз» мавриди баррасӣ қарор дода шуд.

Дар кори нишаст ҳамзамон масъалаҳо оид ба ҳамкории воситаҳои ахбори Иттиҳоди Давлатҳои Мустақил дар ҳалли мушкилоти амнияти ҷаҳонӣ, рушд додани ҳамкорӣ ва механизмҳои муштарак дар самти мубориза бо иттилооти бардурӯғ ва чорабиниҳои асосии Иттиҳоди Давлатҳои Мустақил дар соли 2024 баррасӣ гардид.

Директори Агентии миллии иттилоотии Тоҷикистон «Ховар» Субҳиддин Шамсиддинзода зимни суханронӣ дар мавзуи «Ҳамкории Воситаҳои ахбори оммаи ИДМ дар ҳалли мушкилоти амнияти ҷаҳонӣ» изҳор намуд, ки дар асри 21, ки онро «асри иттилоот» меноманд, имрӯзҳо бо рушди фаъоли технологияҳои иттилоотӣ таъсири иттилоот ба шуури ҷомеа низ зиёд гардида, ин раванд минбаъд низ идома меёбад.

«Аз ин рӯ, воситаҳои ахбори омма бояд моҳияти рӯйдодҳоеро, ки аҳамияти сиёсӣ, иҷтимоӣ, иқтисодӣ ва байналмилалӣ доранд, ба ҷомеа ба таври воқеӣ расонанд ва дар сатҳи баланди касбӣ дар ташаккул додани афкори мусбату дурусти ҷомеа саҳм гузоранд».

Зимнан Субҳиддин Шамсиддинзода нақши ташаббусҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмонро дар ҳалли масъалаҳои глобалии ҷаҳони муосир оид ба тағйирёбии иқлим, истифодаи захираҳои обӣ таъкид намуда, ба иштирокчиён барои дастгирии ташаббусҳои Тоҷикистон якчанд иқдом пешниҳод намуд. «Пеш аз ҳама, инро тавассути гузаронидани чорабиниҳои тарғиботӣ ва паҳн намудани маълумот оид ба аҳамияти истифодаи устувори об ва ҳифзи пиряхҳо, муборизаи муштарак бар зидди терроризм ва ифротгароӣ амалӣ кардан мумкин аст. Хуб мешуд, ки ташаббусҳои Президенти Тоҷикистон, ки аҳамияти ҷаҳонӣ доранд, дар сомонаҳои агентиҳои Иттиҳоди Давлатҳои Мустақил бештар ва ба таври васею назаррас тарғиб шаванд».

Шурои роҳбарони агентиҳои иттилоотии Иттиҳоди Давлатҳои Мустақил бо натиҷагирӣ аз суханронии Директори Агентии миллии иттилоотии Тоҷикистон «Ховар» Субҳиддин Шамсиддинзода барои тақвияти дастгирии иттилоотӣ дар мубориза бо хатари хатару таҳдидҳои ҷаҳони муосир, мушкилоти глобалии марбут ба обу иқлим ва ҳифзи пиряхҳо; инчунин мусоидат ба инъикоси Конфронси сеюми байналмилалии сатҳи баланд оид ба об, ки 10-13 июни соли 2024 дар шаҳри Душанбе баргузор мегардад, қарор қабул намуд.

Хотиррасон мешавем, ки ҷаласаи навбатии Шурои роҳбарони агентиҳои давлатии иттилоотии Иттиҳоди Давлатҳои Мустақил тирамоҳи имсол дар шаҳри Москва баргузор мегардад.

Май 15, 2024 16:41

Хабарҳои дигари ин бахш

Вазири корҳои хориҷии Чин Ван И бо сафари расмӣ ба Ҷумҳурии Тоҷикистон ташриф овард
Тақвияти ҳамкории байнипарлумонӣ байни Тоҷикистон ва Швейтсария баррасӣ шуд
Дар Женева масъалаи тақвияти ҳамкории Тоҷикистон бо «Фонди Дипло» баррасӣ гардид
Ташаббусҳои Тоҷикистон дар соҳаи об ва иқлим дар маҷаллаи бонуфузи Озарбойҷон – «Аzeri Observer» тарғиб гардиданд
Дар Женева тарғиби ташаббусҳои байналмилалии Тоҷикистон дар маҷаллаи «ДИВА Интернейшнал дипломат» баррасӣ шуд
Шараф Шерализода бо Намояндаи доимии Донишгоҳи сулҳ дар назди шуъбаи Созмони Милали Муттаҳид дар Женева мулоқот намуд
Намояндагони Олмон оид ба бахши сайёҳӣ ба Тоҷикистон меоянд
15 МАЙ- РӮЗИ ҶАҲОНИИ ИҚЛИМ. Тағйирёбии иқлим аз ҷомеаи ҷаҳон ҳамкории устувор ва дурандешӣ тақозо менамояд
РАВАНДИ ОБИ ДУШАНБЕ. Дар Конфронси сеюми байналмилалии сатҳи баланд беш аз 100 намояндаи ВАО сабти ном гардид
Дар Женева ҳамкории Тоҷикистон ва Дафтари Созмони Милали Муттаҳид оид ба ҳамоҳангсозии масъалаҳои башардӯстона баррасӣ шуд
Дар Женева ҳамкории дуҷонибаи Тоҷикистон ва Кумитаи байналмилалии Салиби Сурх муҳокима гардид
Дар Берлин бо фаъолони диаспораҳо аз минтақаҳои мухталифи Олмон, Лаҳистон ва Чехия мулоқот доир гардид