Дар Вазорати мудофиа маъракаи даъвати баҳорӣ ба хизмати ҳатмии ҳарбӣ натиҷагирӣ шуд

Июнь 22, 2024 09:48

ДУШАНБЕ, 22.06.2024 /АМИТ «Ховар»/. Дар Вазорати мудофиаи Ҷумҳурии Тоҷикистон фаъолияти комиссариатҳои ҳарбии шаҳру ноҳияҳои мамлакат дар самти даъвати баҳории шаҳрвандон ба хизмати ҳатмии ҳарбӣ ҷамъбасту натиҷагирӣ карда шуд, хабар медиҳад АМИТ «Ховар» бо истинод ба Вазорати мудофиа.

Зимни натиҷагирӣ нисбат ба кормандони масъули комиссариатҳои ҳарбие, ки дар ташкили ин чорабинии муҳими сиёсӣ бемасъулиятӣ зоҳир намуданду ба камбудиҳо роҳ доданд, чораҳои интизомӣ татбиқ гардид.

Сардори Ситоди генералии Қувваҳои Мусаллаҳ, муовинони вазири мудофиа ва сардорони чанде аз раёсатҳои дахлдори ин ниҳоди қудратӣ дар назди иштирокчиён гузориш дода, зимни он пешравию камбудиҳои ҷойдоштаро дар даъвати баҳории шаҳрвандон ба хизмати ҳарбӣ, амалан татбиқ намудану тақвият бахшидани мудофиаи ҳудудӣ, вазъи қонунияту тартиботи ҳуқуқӣ, бартараф намудани ҳама мушкилоти мавҷуда дар фаъолияти масъулини вобастаи ин соҳаро муҳокима ва мавриди натиҷагирӣ қарор доданд.

Таъкид шуд, ки ҳайати шахсии комиссариатҳои ҳарбӣ дар якҷоягӣ бо масъулини мақомоти вобастаи давлатии даъват дар навбати аввал тамоми камбудиҳои ҷойдоштаро пурра бартараф намуда, ҳамкориро бо мақомоти иҷроияи ҳокимияти давлатии шаҳру ноҳияҳо ва аҳли ҷомеа боз ҳам вусъат бахшанд. Инчунин дар ҳамоҳангӣ бо сохтору мақомоти давлативу қудратӣ, нуқтаҳои идоракуниро дар пойгоҳи тамоми комиссариатҳои ҳарбӣ муҷаҳҳаз намуда, тарзи бақайдгирии шаҳрвандонро дуруст ба роҳ монанд ва рӯйхати қувваҳои эҳтиётиро тартиб дода, шумораи захираҳои сафарбарӣ ва теъдоди техникаҳои хоҷагии халқро мушаххасан аниқ намоянд.

Дар доираи дастуру супоришҳои Пешвои миллат муҳтарам Эмомалӣ Раҳмон, роҳбарияти Вазорати мудофиаи мамлакат иштирокчиёни ҷаласаро бобати иҷрои саривақтии тамоми супоришҳо, омодагӣ ба ҷашни 30–солагии Конститутсияи Ҷумҳурии Тоҷикистон, «Соли маърифати ҳуқуқӣ», ҷашни Ваҳдати миллӣ, 35-умин солгарди Истиқлоли давлатӣ ва баҳри таҷлил аз дигар чорабиниҳои сатҳи ҷумҳуриявӣ мушаххасан вазифадор намуд.

Дар охири ҷаласа комиссарони ҳарбие, ки дар даъвати баҳории соли равон нақшаи ба онҳо пешбинигардидаро дар доираи талабот ва дар сатҳи зарурӣ ба анҷом расонида буданд, бо «Ифтихорнома» ва «Сипоснома» сарфароз гардонида шуданд. Ҳамзамон нисбат ба комиссариатҳои ҳарбие, ки дар ташкили ин чорабинии муҳими сиёсӣ бемасъулиятӣ зоҳир намудаву баръакс ба камбудиҳо роҳ дода буданд, чораҳои интизомиро татбиқ намуданд.

АКС: Вазорати мудофиаи Ҷумҳурии Тоҷикистон

Июнь 22, 2024 09:48

Хабарҳои дигари ин бахш

ЧАРО БАСТАНИ ТАСМАИ БЕХАТАРӢ ШАРТ АСТ? Истифодаи он кафолати бехатарии ҳам ронанда ва ҳам мусофир аст
Дар Бохтар лоиҳаи «Шаҳри бехатар» амалӣ мегардад
Дар Душанбе мулоқоти роҳбарони вазоратҳои корҳои дохилии Тоҷикистону Беларус баргузор гардид
4364 САДАМАҲОИ РОҲУ НАҚЛИЁТ ДАР 4 СОЛ. Чӣ тавр пеши роҳи ин ҳодисаҳои нохушро бигирем?
Тоҷикистон дар муборизаи муштарак ба муқобили ҷиноятҳои фаромиллӣ фаъолона иштирок мекунад
Дар Душанбе ҷаласаи роҳбарони мақомоти корҳои дохилии пойтахтҳои давлатҳои аъзои Иттиҳоди Давлатҳои Мустақил баргузор гардид
Дар Бӯстон вохӯрии навбатии гурӯҳҳои кории топографӣ ва гурӯҳҳои кории ҳайатҳои ҳукуматии Тоҷикистону Қирғизистон баргузор гардид
Мулоқоти ҳамраисони ҳайатҳои ҳукуматии Тоҷикистон ва Қирғизистон оид ба делимитатсия ва демаркатсияи сарҳади давлатӣ доир шуд
Прокурори генералии Ҷумҳурии Тоҷикистон бо фаъолони вилояти Суғд вохӯрӣ намуд
Антониу Гутерриш: «Тоҷикистон дар масъалаи буҳрони Афғонистон шарики муҳими Созмони Милали Муттаҳид мебошад»
Президенти Тоҷикистон: «Дар фаъолияти Созмони ҳамкории Шанхай масъалаҳои амнияти минтақавӣ аввалиндараҷа боқӣ мемонанд»
ЭҲТИЁТ — НИМИ ҲАЁТ. Дар фасли тобистон зарфҳои нигаҳдории гази моеъро дар ҷойи соя ва дур аз гармӣ гузоред