НАМУНАИ ИБРАТ БАРОИ ДАВЛАТҲОИ МИНТАҚА. Ҳукумати Тоҷикистон дар ҳалли мушкилоти об дар кишварҳои дигар низ таваҷҷуҳ дорад

ДУШАНБЕ, 13.06.2024 /АМИТ «Ховар»/. «Маротибаи сеюм аст, ки ман ба Тоҷикистон меоям. Соли гузашта низ дар ин ҷо конфронси байналмилалӣ оид ба масоили об баргузор шуда буд, ки дар он ҳузур доштам. Хушҳолам, ки дар баррасии мавзуи муҳим- таъмини бехатарии об ва сифати он иштирок мекунам. Шахсан ман ба омӯзиши таъмини амнияти озуқаворӣ машғул ҳастам, ки ин мавзуъ бевосита ба об алоқаманд аст. Форуми имрӯза ба ҳамин мавзуи барои мо хеле муҳим бахшида шудааст», — чунин гуфт зимни суҳбат ба хабарнигори АМИТ «Ховар» профессори Академияи идоракунии давлатии назди Президенти Ҷумҳурии Қазоқистон Раушан Дуламбаева, ки барои иштирок дар Конфронси сеюми байналмилалии сатҳи баланд бахшида ба Даҳсолаи байналмилалии амал «Об барои рушди устувор, солҳои 2018-2028» дар Душанбе қарор дорад.

Раушан Дуламбаева изҳор кард, ки Ҳукумати Тоҷикистон дар ҳалли мушкилоти об, ба самъи ҷомеаи ҷаҳонӣ расонидани моҳияти мушкилоти мазкур, муҳим ва зарур будани ҳалли он корҳои зиёдро иҷро мекунад.

«Мамлакати шумо барои дигар кишварҳои минтақа намунаи ибрат мебошад, зеро Ҳукумати Тоҷикистон кӯшиш мекунад, ки таваҷҷуҳи ҷомеаи ҷаҳониро на танҳо ба мушкилоти Тоҷикистон, балки ба мушкилоти дигар мамлакатҳо ҷалб кунад», — гуфт Раушан Дуламбаева.

Ба андешаи ҳамсуҳбати АМИТ «Ховар», дар Конфронси байналмилалии сатҳи баланди Душанбе оид ба масоили об намояндагони давлатҳои гуногун бо ташаббусҳо баромад карда, мулоҳизаҳои ҷолиб изҳор мекунанд. Баҳри босамар иҷро кардани вазифаҳои гузошташуда тадбирҳои илман асосноку дар амал санҷидашударо пешниҳод мекунанд. Ҳар ҷониб чораҳои мутаносиб ва мувофиқ ба кишвари худро қабул мекунад. Дар баробари ҳамин ҳалли мушкилоти об раванди муқаррарӣ нест, ҳалли ин мушкилоти ҷаҳонӣ ҳамгироӣ ва амалҳои ҳамоҳангшударо тақозо мекунад.

«Ба кишварҳои Осиёи Марказӣ зарур аст, ки муттаҳид бошанд, зеро об барои ҳамаи мо муҳим аст, зиёда аз ин кишварҳои мо ҳамсарҳад ҳастанд. Дар ин маврид дипломатияи об ва омода намудани мутахассисон зарур аст. Бояд лоиҳа ва барномаҳоеро, ки рӯи даст дорем, амалӣ созем ва натиҷаҳои хуб ба даст орем», — гуфт Раушан Дуламбаева.

АКС: АМИТ «Ховар»