ТОҶИКИСТОНУ ЧИН – ШАРИКОНИ СТРАТЕГӢ. Дар Академияи миллии илмҳои Тоҷикистон дар ин мавзуъ конференсияи байналмилалӣ баргузор шуд

ДУШАНБЕ, 22.06.2024 /АМИТ «Ховар»/. 21 июн дар Академияи миллии илмҳои Тоҷикистон бо иштироки олимони муассисаҳои илмии Тоҷикистону Чин Конференсияи байналмилалӣ таҳти унвони «Тоҷикистон ва Чин – шарикони ҳамаҷонибаи стратегӣ» баргузор гардид. Дар ин хусус АМИТ «Ховар» бо истинод ба Академияи миллии илмҳои Тоҷикистон хабар медиҳад.

Пеш аз оғози конференсия меҳмонон намоишгоҳи дастнависҳои хаттии Маркази мероси хаттии назди Раёсати Академияи миллии илмҳои Тоҷикистонро тамошо карда, таассуроташонро доир ба фарҳангу осори шоирону мутафаккирони барҷастаи тоҷик иброз намуданд.

Дар конференсия президенти Академияи миллии илмҳои Тоҷикистон Қобилҷон Хушвахтзода гуфт, ки «солҳои охир дар заминаи иртиботи шахсӣ ва муносибатҳои дӯстонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Раиси Ҷумҳурии Мардумии Чин Си Ҷинпин эътимоди сиёсӣ ва ҳамкории мутақобила байни ҳарду давлат ба сатҳи бесобиқа олӣ расидаанд. Мо бояд ин муносибатҳои дӯстонаро густариш дода, дар соҳаи илмҳои гуманитарӣ натиҷаҳои назаррасро ба даст орем. Тавре Президенти мамлакат муҳтарам Эмомалӣ Раҳмон дастуру супориш доданд, бояд раванди ҳамкории илмию таҳқиқотӣ, доир намудани конфронсу форумҳои илмию назариявӣ, ҳамчунин омӯзиши таъриху фарҳанги миллати тоҷику чинӣ, тақвияти бештар ёбад ».

Ноиби президенти Академияи илмҳои ҷамъиятии Чин Чжен Чжан Мин барои баргузор намудани чунин конференсияи сатҳи байналмилалӣ изҳори сипос намуда, таъкид кард, ки мо дар ҳама ҳолат омода ҳастем ҳамкории илмии худро бо муассисаҳои илмии Тоҷикистон дар низоми сифтан нав ва дар доираи созишномаҳои имзогардида густариш дода, дар соҳаи илмҳои гуманитарӣ таҳқиқоти илмиро тақвият бахшем.

Дар конференсия аз ду ҷониб дар мавзуи мавриди назар маърузаҳои пурмуҳтаво пешниҳод гардиданд.

Ёдовар мешавем, ки 28 апрели соли 2019 дар шаҳри Пекин дар доираи сафари корӣ ба Ҷумҳурии Мардумии Чин ва иштирок дар Форуми дуюми ҳамкории байналмилалӣ «Як камарбанд, як роҳ» Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Академияи илмҳои ҷамъиятии Чин ташриф оварда, бо роҳбарият ва аъзои он мулоқот намуданд. Нахуст муҳтарам Эмомалӣ Раҳмон бо Президенти Академияи илмҳои ҷамъиятии Ҷумҳурии Мардумии Чин Сие Фучжан мулоқот карданд.

Пешвои миллат аз нашри китоби пурарзиши «Тоҷикон дар оинаи таърих» ва рӯнамоии он дар Академияи илмҳои ҷамъиятии Чин ҷиҳати муаррифии боз ҳам бештари давлати Тоҷикистон ва миллати тоҷик қаноатмандӣ намуданд.

АКС: Академияи миллии илмҳои Тоҷикистон