Дар Варзишгоҳи «20-солагии Истиқлолият»-и шаҳри Хуҷанд насби чароғу сутунпояҳо оғоз гардид

ДУШАНБЕ, 26.07.2024. /АМИТ «Ховар»/. Дар Варзишгоҳи «20-солагии Истиқлолият»-и шаҳри Хуҷанд насби чароғу сутунпояҳо оғоз гардид, ки то ҷашни Истиқлоли давлатии Ҷумҳурии Тоҷикистон корҳо ба анҷом расонида мешаванд. Дар ин хусус АМИТ «Ховар» бо истинод ба Хадамоти матбуоти Раиси вилояти Суғд хабар медиҳад.

Бо мақсади иҷрои дастуру супоришҳои Президенти Федератсияи футболи Тоҷикистон муҳтарам Рустами Эмомалӣ Варзишгоҳи «20-солагии Истиқлолият» дар шаҳри Хуҷанд бо таҷҳизоти зарурии равшанидиҳанда таъмин карда мешавад.

Таъкид гардид, ки барои таъмини рӯшноӣ дар варзишгоҳ ва гузаронидани футбол дар вақти шабона тадбирҳои муҳим амалӣ шуда, чароғу лавозимоти зарурӣ дастрас гардид.

Раиси вилояти Суғд Раҷаббой Аҳмадзода бо ҷараёни насби таҷҳизот дар варзишгоҳ шинос гардида, татбиқи босифат ва саривақтии лоиҳаро муҳим арзёбӣ намуд.

АКС: Хадамоти матбуоти Раиси вилояти Суғд