Шаҳри бостонии Истаравшан аъзои Шурои ҷаҳонии ҳунармандон мешавад
СУҒД, 07.07.2024 /АМИТ «Ховар»/. Ҳайати Комиссияи кории Шурои умумиҷаҳонии ҳунармандон ба шаҳри зебои Истаравшан ташриф овард. Ноиби Котиби генералии Шурои ҷаҳонии ҳунармандӣ, масъули минтақаи Осиёи Ҷанубӣ (Шри-Ланка) Сампат Эрахапола ва ноиби роҳбари Шурои ҳунармандон дар минтақаи Осиёву Уқёнуси Ором, масъули Осиёи Марказӣ (Қазоқистон) Айдархан Кулиев бо маҳсули дасти ҳунармандони шаҳри Истаравшан шинос шуданд. Дар ин хусус ба АМИТ «Ховар» дар маркази матбуоти Раиси шаҳри Истаравшан хабар доданд.
Зимни суҳбати Раиси шаҳри Истаравшан бо меҳмонон иттилоъ дода шуд, ки Истаравшан дар тӯли ҳазорсолаҳо дар масири Шоҳроҳи Бузурги Абрешим арзи ҳастӣ дошта, дар минтақа аз шаҳрҳои қадима маҳсуб меёбад. Сокинони ин шаҳр асосан бо ҳунармандию тоҷирӣ, кишоварзию чорводорӣ машғул буда, тӯли садсолаҳо аҳолии маркази шаҳр асосан бо ҳунармандӣ ном баровардаанд. Аз ин лиҳоз минтақабандии маркази шаҳри Истаравшан ба гузарҳо тақсим гардида, ҳар гузар бо номи ҳунаре пайванд аст, ба амсоли чармгарон, собунгарон, кордгарон, мехчагарон, саллабофон ва дигар гузарҳо.
Сампат Эрахапола пас аз шиносоӣ бо ҳунарҳои қадимаи ҳунармандони шаҳр иброз дошт, ки барои эътирофи Истаравшан ба ҳайси шаҳри ҳунармандӣ дар арсаи ҷаҳонӣ мусоидат хоҳад кард.
«Воқеан шаҳри Истаравшан нахустин ташаббускор аз Ҷумҳурии Тоҷикистон мебошад, ки барои шомил гардидан ба узвияти Шурои ҷаҳонии ҳунармандӣ муроҷиат намуд», — баён дошт Айдархан Кулиев.
Таъкид гардид, ки ҳайати комиссия барномаи кории пешниҳодшударо қобили қабул дониста, изҳори боварӣ карданд, ки дар доираи он имконият фароҳам аст то бо ҳунармандию ҳунарҳои мардумии шаҳри Истаравшан аз наздик шинос шаванд ва хулосаи хешро барои ҳайати бонуфузи Шурои ҷаҳонии ҳунармандӣ оид ба эътирофи шаҳри Истаравшан ҳамчун шаҳри ҳунармандон дар арсаи байналмилалӣ муаррифӣ созанд.
АКС: Дафтари матбуоти Раиси шаҳри Истаравшан










Имрӯз дар ноҳияҳои алоҳидаи Тоҷикистон борони кӯтоҳмуддат меборад
Дар Душанбе Консорсиуми сармоягузории «Area AI» ба имзо расид
ОМОДАГӢ БА ЗИМИСТОН. Кумитаи ҳолатҳои фавқулода ва мудофиаи граждании Тоҷикистон ба шаҳрвандон тавсияҳои муфид пешниҳод менамояд
Дар Суғд ҳашарҳои экологии «Тозагии маҳал», «Тозагии шоҳроҳ» ва «Тозагии соҳил» гузаронида шуданд
Оид ба нақши Донишгоҳи давлатии Кӯлоб дар рушди илм ва маориф конфронси ҷумҳуриявӣ доир шуд
Имрӯз дар водиҳои Тоҷикистон ҳаво то 28 дараҷа гарм мешавад
ТАҚВИМИ АМИТ «ХОВАР»: имрӯз 26 октябр, якшанбе, 299-умин рӯзи соли 2025 аст
ОМОДАГӢ БА ЗИМИСТОН. Сохторҳои буҷетии ноҳияи Сангвор ба мавсими сармо пурра омода мебошанд
Имрӯз дар баъзе ноҳияҳои Тоҷикистон чангу ғубор ба амал меояд
Имрӯз дар шаҳри Душанбе ҳаво то 27 дараҷа гарм мешавад
Дар ноҳияи Бобоҷон Ғафуров вобаста ба таъмини бехатарии радиатсонӣ машварат баргузор шуд
Нақши ниҳодҳои ҷамъиятӣ дар самти ҳифзи муҳити зист ва ёдгориҳои таърихию фарҳангӣ баррасӣ гардид






