Имрӯз дар Душанбе Форуми ҷавонони Тоҷикистон ва Қазоқистон оғоз шуд

Август 15, 2024 13:40

ДУШАНБЕ, 15.08.2024. /АМИТ «Ховар»/. Имрӯз дар шаҳри Душанбе Форуми ҷавонони Тоҷикистон ва Қазоқистон оғоз гардид, иттилоъ медиҳад АМИТ «Ховар».

Форум аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон ташкил гардида, ба рушди ҳамкорӣ дар оянда, мубодилаи афкор ва таҷрибаи ҷавонони фаъол, инчунин дарёфти роҳҳои ҳалли масъалаҳои калидии сиёсати ҷавонон мусоидат менамояд.

Дар ифтитоҳи кори форум таъкид гардид, ки аз ҷониби давлату Ҳукумати мамлакат ҳамасола барои дастгирии иҷтимоии ҷавонон ва боло бурдани ҳисси ватандӯстии онҳо стратегияҳо ва барномаҳои зиёди соҳавӣ қабул ва амалӣ мешаванд.

Аз ҷумла, бо мақсади фароҳам овардани шароити мусоиди таъсиркунанда барои тарбияи маънавию ҷисмонии ҷавонон, инкишофи ҳисси ватандӯстӣ ва муҳаббати онҳо дар руҳияи ватандӯстӣ, маърифатнокӣ, худогоҳӣ, инсондӯстӣ, ифтихор ва арҷгузорӣ ба арзишҳои миллӣ, эмин нигоҳ доштани насли ҷавон аз таҳдидҳои замони муосир «Барномаи давлатии тарбияи ватандӯстӣ, эҳсоси масъулияти шаҳрвандӣ ва таҳкими ҳувияти миллии ҷавонони Тоҷикистон барои солҳои 2023-2027» дар сатҳи ҷумҳурӣ ва маҳал амалӣ мегардад.

Илова бар ин барои амалишавии 10 самти афзалиятноки сиёсати давлатии кор бо ҷавонон, ки аз Қонуни Ҷумҳурии Тоҷикистон «Дар бораи ҷавонон ва сиёсати давлатии ҷавонон» бармеояд, «Барномаи миллии рушди иҷтимоии ҷавонон дар Ҷумҳурии Тоҷикистон барои солҳои 2022 – 2026» дар сатҳи ҷумҳурӣ ва маҳал амалӣ мешавад. Дар заминаи ин барнома аз ҷониби мақомоти иҷроияи ҳокимияти давлатии вилоятҳо ва шаҳру ноҳияҳои ҷумҳурӣ барномаҳои маҳаллии рушди иҷтимоии ҷавонон қабул ва татбиқ мегардад.

Раиси Кумитаи кор бо ҷавонон ва варзиши наазди Ҳукумати Ҷумҳурии Тоҷикистон Зулфиқор Гулаҳмадзода изҳор дошт, ки дар шароити равандҳои муосири сиёсӣ, иқтисодӣ ва иҷтимоӣ ҷавонон ба манбаи стратегӣ табдил меёбанд, ки ин рушди на танҳо давлат, балки муносибатҳои байналмилалиро дар ояндаи дур муайян мекунад.

«Ҳамкории байнидавлатӣ метавонад на танҳо ба ноил шудан ба ҳадафҳои дар назди давлатҳо гузошта, балки ба самаранокии татбиқи барномаҳои миллӣ ва стратегияҳои рушд, аз ҷумла истифодаи неруи насли наврас низ таъсири назаррас расонад. Барои рушди ҳамаҷонибаи ҳар давлат неру, майлу эҷодкорӣ ва тафаккури навоваронаи ҷавононро истифода бурдан зарур аст», — гуфт Раиси Кумита.

Ҳамзамон Раиси Кумитаи кор бо ҷавонон ва оилаи Ҷумҳурии Қазоқистон Кайрат Камбаров иброз дошт, ки форум имконияти мусоид барои мубодилаи таҷриба, барқарор кардани тамосҳои нав ва амалисозии лоиҳаҳои муштарак буда, дар роҳи мустаҳкам кардани ҳамкорӣ ва дӯстӣ байни ҷавонони Тоҷикистон ва Қазоқистон қадами муҳим мебошад.

Ҳадафҳои асосӣ ва вазифаҳои форум ба тақвияти ҳамкорӣ байни ташкилоти ҷавонони Тоҷикистон ва Қазоқистон, рушди сиёсати ҷавонон ва таҳияи стратегияҳои муштарак барои ҳалли мушкилоти мубрами ҷавонони ду давлат равона шудаанд.

Ёдовар мешавем, ки Форуми ҷавонони Тоҷикистон ва Қазоқистон пагоҳ низ идома меёбад.