Агентиҳои иттилоотии Иттиҳоди Давлатҳои Мустақил рушди ҳамкориро баррасӣ намуданд
ДУШАНБЕ, 17.09.2024 /АМИТ «Ховар»/. 16 сентябр дар шаҳри Москва ҷаласаи XXXII Шурои роҳбарони агентиҳои давлатии Иттиҳоди Давлатҳои Мустақил баргузор шуд, иттилоъ медиҳад хабарнигори АМИТ «Ховар».
Дар ҷаласа, ки ба 120-солагии таъсиси куҳантарин агентии Русия бахшида шуд, дабири кулли Иттиҳоди Давлатҳои Мустақил Сергей Лебедев, намояндагони корпусҳои дипломатии кишварҳои Иттиҳоди Давлатҳои Мустақил ва ҳамчунин воситаҳои ахбори оммаи пешрафтаи давлатҳои хориҷаи наздик иштирок намуданд.
«Дар замоне, ки қоидаҳои қаблии ҷомеаи иттилоотӣ ба таври ҷиддӣ таҷдиди назар мешаванд, чунин мулоқотҳо аҳамияти хосса доранд. Онҳо ба таҳияи шаклҳои нави ҳамкории байналмилалии агентиҳои иттилоотии Иттиҳоди Давлатҳои Мустақил барои таъмини субот дар фазои Иттиҳод мусоидат менамоянд. Итминон дорам, қарорҳое, ки Шурои иттилоотии Иттиҳоди Давлатҳои Мустақил қабул намудааст, ба таҳкими ҳамкорӣ байни давлатҳои мо ва татбиқи лоиҳаҳои муҳими муштарак дар соҳаи иттилоот мусоидат мекунанд», — иброз намуд Сергей Лебедев.
Иштирокчиёни ҷаласа таҳти раёсати директори генералии ТАСС Андрей Кондрашов доираи васеи масъалаҳо, аз ҷумла истифодаи технологияҳои муосири воситаҳои ахбори омма, дастгирии иттилоотии барномаҳои омӯзиши забони русӣ, рӯзномаи иқлим, рушди ҳамкории фарҳангӣ-гуманитарӣ дар доираи Иттиҳод ва лоиҳаҳоеро, ки ба таҳкими робитаҳо дар соҳаи фарҳанг, илм, табодули ҷавонон ва сайёҳӣ нигаронида шудаанд, баррасӣ намуданд.
Ба аъзои Шурои иттилоотӣ консепсияи сомонаи навшудаи Ассотсиатсияи агентиҳои миллии иттилоотии давлатҳои аъзои Иттиҳоди Давлатҳои Мустақил пешниҳод шуд, ки онро мутахассисони ТАСС таҳия кардаанд. Дар сомонае, ки лоиҳаи муштараки агентиҳои иттилоотии давлатҳои Иттиҳоди Давлатҳои Мустақил маҳсуб мешавад, шабакаи умумии хабарӣ таъсис шуда, маълумоти визуалӣ дар бораи ҳаёти давлатҳои хориҷаи наздик нашр мегардад.
Интизор меравад, платформаи наве, ки барои Ассотсиатсияи агентиҳои миллии иттилоотӣ таҳия шудааст, имконотро барои ҳамкории касбӣ байни агентиҳои иттилоотӣ ба таври назаррас васеъ менамояд.
Самтҳои рушди ҳамкорӣ дар чаҳорчӯби табодули журналистӣ ва баланд бардоштани ихтисоси касбӣ баррасӣ шуданд.
Шурои иттилоотии Иттиҳоди Давлатҳои Мустақил соли 1995 таъсис ёфтааст. Ба ҳайати он роҳбарони агентиҳои иттилоотии давлатии Озарбойҷон, Арманистон, Беларус, Тоҷикистон, Қазоқистон, Қирғизистон, Молдова ва Русия дохил мешаванд.
АКС: Кумитаи иҷроияи Иттиҳоди Давлатҳои Мустақил
Пагоҳ Рӯзи фарҳанги шаҳри Норак, ноҳияҳои Фархор, Ёвон ва Мастчоҳ доир мегардад
НИШАСТИ МАТБУОТӢ. «Тоҷикфилм» истеҳсоли се филми пурраметражи ҳунариро ба анҷом расонид
НИШАСТИ МАТБУОТӢ. Кумитаи забон ва истилоҳот фаъолияти 75 ташкилотро мавриди санҷиш қарор дод
Филми ҳунарии «Моҳӣ дар шаст» дар кинофестивали байналмилалии Ярослав соҳиби се ҷоиза шуд
Бо мақсади муаррифии васеи Тоҷикистон як зумра филмҳои мустанад ба забони англисӣ тарҷума ва дубляж гардиданд
Дар Душанбе Рӯзҳои фарҳанги шаҳрҳои Истаравшан, Норак ва ноҳияҳои Фархор, Носири Хусрав, Ёвон, Мастчоҳ ва Дӯстӣ доир мегарданд
«Харитаи хатсайри Шӯриши Восеъ» ба ҷалби бештари сайёҳони дохилию хориҷӣ мусоидат менамояд
Корҳои тармиму барқарорсозӣ дар ёдгориҳои Қалъаи Муъминобод, Қалъаи Кӯлоб ва қасри Ҳокими Ҳисор идома доранд
Дар Бадахшон даври вилоятии Озмуни ҷумҳуриявии «Тоҷикистон — Ватани азизи ман» ҷамъбаст гардид
Бо иштироки олимони бостоншинос филми мустанади «Хутали қадим» таҳия гардид
Дар Тоҷикистон 6 агентии иттилоотӣ, аз ин 1 давлатӣ ва 5 мустақил фаъолият доранд
НИШАСТИ МАТБУОТӢ. «Шоҳи қуллаҳо» — филми мустанад дар мавзуи ҳифзи бабри барфӣ сазовори ҷоиза гардид
