Намояндаи Тоҷикистон дар Форуми 5-уми ҳамкории мудирияти андоз дар Чин иштирок намуд

Сентябрь 30, 2024 11:55

ДУШАНБЕ, 30.09.2024 /АМИТ «Ховар»/. 24-26 сентябр дар шаҳри Ҳонгконги Ҷумҳурии Мардумии Чин Форуми 5-уми ҳамкории мудирияти андоз дар мавзуи «Амиқтар ва беҳтар намудани ҳамкорӣ дар доираи ташаббуси «Як камарбанд – як роҳ» баргузор гардид, ки дар он намояндаи Тоҷикистон иштирок ва суханронӣ намуд, хабар медиҳад АМИТ «Ховар» бо истинод ба Кумитаи андози назди Ҳукумати Ҷумҳурии Тоҷикистон.

Дар форум Раиси Кумитаи андози назди Ҳукумати Ҷумҳурии Тоҷикистон Нусратулло Давлатзода дар мавзуи «Беҳтар намудани фазои андозбандӣ дар Ҷумҳурии Тоҷикистон» маъруза кард. Ӯ доир ба асосҳои ҳуқуқии хизматрасонӣ ба андозсупорандагон, шаклҳои хизматрасонии электронӣ ба андозсупорандагон ва шумораи чунин хизматрасонӣ маълумоти муфассал пешниҳод намуд.

Нусратулло Давлатзода иброз намуд, ки Кумитаи андоз бо дастгирии Ҳукумати Ҷумҳурии Тоҷикистон ва созмонҳои байналмилалии молиявӣ дар раванди татбиқи «Барномаи рушди маъмурикунонии андоз барои солҳои 2020-2025» барои беҳбуди маъмурикунонии андоз ба нишондиҳандаҳои назаррас ноил гардидааст.

Ҳамчунин дар муҳокимаи панелӣ иштирок намуда, ба саволҳои иштирокчиён оид ба рақамикунонии соҳаи андоз, фазои андозбандӣ ва ҷараёни ислоҳоти андозии Ҷумҳурии Тоҷикистон посухҳои муфассал дод.

Инчунин дар доираи форум Нусратулло Давлатзода бо намояндагони мақомоти давлатии давлатҳои аъзои ҳавзаи ташаббуси «Як камарбанд – як роҳ», аз ҷумла бо Вазири хизматрасонии молиявӣ ва хазинадории Ҳонконги Ҷумҳурии Мардумии Чин Кристофер Хуэй вохӯрӣ намуд.

Дар форум беш аз 500 намояндаи мақомоти андози зиёда аз 50 давлати гуногуни ҷаҳон масъалаҳои андозбандӣ ва табодули таҷриба дар соҳаи идоракунии андозро баррасӣ карданд.

Иштирокчиёни форум доир ба мавзуъҳои баланд бардоштани сатҳи эътимоднокии андоз, мусоидат ба рақамикунонии маъмурикунонии андоз, беҳтарнамоии муҳити андоз ва тақвият додани неруи кадрии мақомоти андоз мубодилаи афкор намуданд.

АКС: Кумитаи андози назди Ҳукумати Ҷумҳурии Тоҷикистон

Сентябрь 30, 2024 11:55

Хабарҳои дигари ин бахш

Сарвазири мамлакат Қоҳир Расулзода дар ноҳияи Дӯстӣ бо рафти ҷамъоварии ҳосили пахта ва корҳои созандагӣ шинос гардид
Дар Душанбе таҳкими ҳамкорӣ вобаста ба конфронси СИТЕС баррасӣ шуд
Шуруъ аз 16 сентябр дар масири Сиан-Душанбе парвозҳои мустақими ҳавоӣ оғоз мегарданд
Тоҷикистон ва Иттиҳоди Аврупо ҳамкориро дар соҳаи энергетика ва захираҳои об тақвият медиҳанд
Сарвазири мамлакат Қоҳир Расулзода дар ноҳияи Кӯшониён бо ҷараёни корҳои созандагӣ ва хоҷагидорӣ шинос шуд
Сиёсати Тоҷикистон дар самти идоракунии ҳамгироёнаи захираҳои об дар Шветсия муаррифӣ карда шуд
Бонки аврупоии таҷдид ва рушд барои таҷдиди низоми нақлиёти шаҳри Душанбе маблағ ҷудо менамояд
Дар Минтақаи озоди иқтисодии «Данғара» татбиқи лоиҳаҳои муштарак бо сармоягузорони Чин баррасӣ карда шуд
Дар Неругоҳи барқи обии «Роғун» роботи махсуси кафшерӣ ба истифода дода шуд
Роҳҳои афзоиш додани ҳаҷми истеҳсол ва коркарди нахи пахта дар Тоҷикистон баррасӣ гардид
Дар Чин масъалаи вазъи заминҳои шӯр ва ишқордор баррасӣ шуд
Ангури хуштаъми Тоҷикистон дар бозорҳои шаҳри Самара ба фурӯш гузошта шудааст