Покистон талошҳои Тоҷикистонро дар таҳкими сулҳу субот дар минтақа самарабахш арзёбӣ менамояд

ДУШАНБЕ, 20.09.2024 /АМИТ «Ховар»/. 18 сентябр мулоқоти Сафири Фавқулода ва Мухтори Тоҷикистон дар Покистон Юсуф Шарифзода бо Вазири федеролии мудофиаи Покистон Хавоҷа Муҳаммад Осиф баргузор шуд. Дар ин хусус АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Зимни мулоқот доираи васеи масъалаҳои равобити Тоҷикистон ва  Покистон, бахусус дар соҳаҳои иқтисодӣ, авиатсияи гражданӣ, амниятӣ ва низомии техникӣ мавриди баррасӣ қарор дода шуд. Ҷонибҳо вобаста ба вазъи имрӯзаи низомию сиёсӣ ва иқтисодиву иҷтимоии Афғонистон, ки ба ҳолати амниятии минтақа таъсири бевосита мерасонад, ҳамчунин дигар масъалаҳои хоси мавриди эҳтимоми муштарак мубодилаи афкор анҷом доданд.

Таъкид гардид, ки Покистон талошҳои Тоҷикистонро дар таҳкими сулҳу субот дар минтақа самарабахш арзёбӣ менамояд.

Зимни суҳбат инчунин муҳимияти татбиқи лоиҳаи энергетикии «CASA-1000» барои кишварҳои минтақа таъкид карда шуд.

АКС: Вазорати корҳои хориҷии Ҷумҳурии Тоҷикистон