35-СОЛАГИИ ИСТИҚЛОЛИ ДАВЛАТӢ. Дар Истаравшан 990 бинову иншоот сохта ва навсозӣ мешавад

ДУШАНБЕ, 23.10.2024 /АМИТ «Ховар»/. Дар шаҳри Истаравшани вилояти Суғд бахшида ба ҷашни 35-солагии Истиқлоли давлатии Ҷумҳурии Тоҷикистон таъмиру навсозӣ ва сохтмони 990 бинову иншоот ба нақша гирифта шуда, то ин давра 553 адади он ба истифода дода шудааст. Дар ин хусус АМИТ «Ховар» бо истинод ба хадамоти матбуоти Раиси вилояти Суғд хабар медиҳад.

Дар натиҷаи тадбирандешиҳо дар нуҳ моҳи соли равон дар шаҳр ҳаҷми истеҳсоли маҳсулоти саноатӣ ба 1 миллиарду 153 миллиону 238 ҳазор сомонӣ расонида шуд. Ин нисбат ба ҳамин давраи соли 2023 331 миллион сомонӣ зиёд буда, 140 фоизро ташкил медиҳад.

Тибқи маълумоти оморӣ, ҳоло дар шаҳри Истаравшан 96 корхонаи калону хурди истеҳсолӣ фаъолият мекунанд. Барои зиёд намудани ҳаҷми истеҳсоли маҳсулоти саноатӣ аз ҳисоби баистифодадиҳии иқтидори нави истеҳолӣ мунтазам чораҷӯӣ карда мешавад.

Дар натиҷаи меҳнати аҳлонаи сокинони шаҳр рушди соҳаҳо таъмин шуда, нақшаи даромади буҷети давлатӣ (бо назардошти андози иҷтимоӣ) ба андозаи 116,9 фоиз таъмин гардид. Ба буҷет 311 миллиону 77,3 ҳазор сомонӣ ворид гардид, ки нисбат ба ҳамин давраи соли 2023 67 миллиону 334,8 ҳазор сомонӣ зиёд мебошад.

АКС: Хадамоти матбуоти Раиси вилояти Суғд