Бахшида ба Рӯзи забони давлатӣ ва Рӯзи омӯзгорон дар Донишгоҳи техникии Тоҷикистон ҳамоиши тантанавӣ доир шуд

ДУШАНБЕ, 05.10.2024 /АМИТ «Ховар»/. 3 октябр дар Донишгоҳи техникии Тоҷикистон ба номи академик Муҳаммад Осимӣ бахшида ба Рӯзи забони давлатӣ ва Рӯзи омӯзгорон ҳамоиши тантанавӣ баргузор шуд, хабар медиҳад АМИТ «Ховар» бо истинод ба ин донишгоҳ.

Ректори Донишгоҳи техникии Тоҷикистон Қудрат Давлатзода оид ба қадру манзалати омӯзгор, нақши таърихии забони тоҷикӣ ва покиза нигоҳ доштани он иброз намуд, ки қарзи фарзандӣ ва рисолати инсонии мо ин аст, ки забони модариамон- забони ширину шоиронаро баробари модари худ азиз донем, дӯст дорем ва эҳтирому эҳтиёт намоем.

Иброз гардид, ки таваҷҷуҳи Ҳукумати мамлакат ба соҳаи маориф бештар аст ва ҳамасола барои баланд бардоштани мавқеи омӯзгор дар ҷомеа тамоми имконият истифода мешавад. Ҳадаф аз таваҷҷуҳи хоссаи давлат ва Ҳукумати мамлакат нисбат ба соҳаи илму маориф аз он иборат аст, ки сифати таҳсил дар муассисаҳои таҳсилоти миёна ва олии касбӣ баланд бардошта, насли ояндасози мамлакат бо фаро гирифтани илму дониши муосир барои рушди минбаъдаи иҷтимоиву иқтисодии Ватан, пешрафти давлат ва ҳифзи марзу буми сарзамини аҷдодӣ омода гардад.

Бо мақсади арҷгузорӣ ба заҳмати омӯзгор як зумра омӯзгорони донишгоҳ бо Сипоснома қадрдонӣ шуданд.

АКС: Донишгоҳи техникии Тоҷикистон ба номи академик Муҳаммад Осимӣ