Дар Донишгоҳи давлатии Бохтар конференсияи байналмилалии илмӣ-назариявӣ баргузор шуд

ДУШАНБЕ, 26.10.2024. /АМИТ «Ховар»/. 25 октябр дар Донишгоҳи давлатии Бохтар ба номи Носири Хусрав бахшида ба 1020-солагии мутафаккири бузург Носири Хусрав ва «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» таҳти унвони «Муаммоҳои омӯзиши осори Носири Хусрав ва саҳми ӯ дар таърихи тамаддуни тоҷикон» конференсияи байналмилалии илмӣ-назариявӣ баргузор гардид. Дар ин хусус ба АМИТ «Ховар» дар ин донишгоҳ иттилоъ доданд.

Дар конференсия олимон ва адибон оид ба эҷодиёти Носири Хусрав сухан гуфтанд.  Иброз гардид, ки ғояи осору таълифоти адибро омӯзиши илму адаб, тарғиби хислатҳои ахлоқи ҳамидаи инсонӣ, фарқ кардани дӯст аз душман, дар дӯстӣ бовафо будан, эҳсон кардан, некӯхоҳ ва роҳатрасон будан, тамаъ ва хорӣ накардан дар бар гирифтааст.

Ба аҳли конференсия беш аз 100 мақолаи илмӣ-назариявии муҳаққиқони ватаниву хориҷӣ, ки дар онҳо масъалаҳои гуногун баррасӣ шуда, дар шакли мавод рӯйи нашр омадаанд, дастрас гардид.

АКС: Донишгоҳи давлатии Бохтар ба номи Носири Хусрав