Дар Донишгоҳи техникии Тоҷикистон доир ба самтҳои нави рушди илм дар соҳаҳои техникӣ конференсия доир шуд

ДУШАНБЕ, 11.10.2024 /АМИТ «Ховар»/. 10 октябр дар Донишгоҳи техникии Тоҷикистон ба номи академик Муҳаммад Осимӣ дар мавзуи «Самтҳои нави рушди илм дар соҳаҳои техникӣ» конференсияи байналмилалии илмию амалӣ баргузор гардид, хабар медиҳад АМИТ «Ховар» бо истинод ба ин донишгоҳ.

Дар конференсия олимони тоҷик ва олимон аз муассисаҳои илмиву таълимии Ҳиндустон, Беларус ва Швейтсария маъруза намуданд.

Конференсия дар бахшҳои сохтмон ва меъморӣ, энергетика ва илмҳои техникӣ, технологияҳои иттилоотӣ, илмҳои иҷтимоӣ ва гуманитарӣ идома ёфта, омӯзгорону донишҷӯён аз дохил ва хориҷи ҷумҳурӣ маърузаи илмӣ намуданд.

Ҳадаф аз конференсияи байналмилалӣ мубодилаи афкори илмӣ-амалӣ, муайян намудани дурнамои рушди илмҳои дақиқ ва техникаю технологияи муосир, рушди ҳамкории илмию байналмилалӣ дар самти баланд бардоштани сифати таҳсил ва робитаи илм бо истеҳсолот мебошад.

АКС: Донишгоҳи техникии Тоҷикистон ба номи академик Муҳаммад Осимӣ