Дар Донишгоҳи технологии Тоҷикистон бахшида ба Соли маърифати ҳуқуқӣ ҷаласа баргузор шуд

ДУШАНБЕ, 10.10.2024 /АМИТ «Ховар»/. 9 октябр дар Донишгоҳи технологии Тоҷикистон бахшида ба Соли маърифати ҳуқуқӣ ва 30-солагии қабули Конститутсияи Ҷумҳурии Тоҷикистон дар мавзуи «Пешгирии ҳамроҳшавиии ҷавонон ба гурӯҳҳои террористию экстремистӣ» бо иштироки намояндагони ҳифзи ҳуқуқи шаҳри Душанбе ҷаласа баргузор шуд, хабар медиҳад АМИТ «Ховар» бо истинод ба ин донишгоҳ.

Дар ҷаласа доир ба тарбияи ватандӯстии ҷавонон, баланд бардоштани ҳувияти миллӣ, маърифати сиёсиву ҳуқуқӣ, аз худ намудани илму донишҳои муосир, пешгирии ҷинояту ҷинояткорӣ, пешгирӣ аз ҳамроҳшавии ҷавонон ба ҳизбу ҳаракатҳои иртиҷоӣ, даъвати ҷавонон ба хизмати Ватан, истифодаи дурусти телефонҳои мобилӣ ва шабакаҳои иҷтимоии интернетӣ, риояи талабот ва одоби шаҳрнишинӣ ва дигар масъалаҳои мубрами рӯз ибрози назар гардид.

Дар анҷоми ҷаласа бо назардошти пайомад ва хатару таҳдидҳои фаъолияти ташкилоти террористӣ ва гурӯҳҳои ифротӣ дар баробари мақомоти дахлдор, инчунин аз тамоми ҷавонони ҷумҳурӣ ва шаҳрвандон даъват шуд, ки тамоми дониш ва неруи худро барои мубориза бо ин зуҳуроти номатлуб истифода баранд.

АКС: Донишгоҳи технологии Тоҷикистон